الخميس، 21 أكتوبر 2021 - 05:23 م

وائل الملاح

عارف انه طلب صعب إنك تفرفش وتضحك وتنسى همومك، لكن ما تحرجنيش، ده باب رزق، جابونى هنا مخصوص اكتب كلمتين أضحكك بيهم.   

فرفش بقى، ده أول طلب اطلبه منك، خصوصا لما تعرف إنك عشان تكشر تحتاج لتحريك عضلات أكثر من تلك التى تحتاج ان تحركها لكى تبتسم، يعنى ابتسم حتى من باب الكسل.

عارف انه صعب خصوصا لو عدى عليك محصل الكهرباء اليوم «أموت وافهم بيعرف أن القبض نزل ازاي!»، وحتى لو سحب كل فلوسك، وحتى لو لمحت فى عينيه نظرة الفرح فيك وانت متحسر على المبلغ المكتوب فى الوصل «مثل هذا المحصل الذى قلت له: نجيبلكم فلوس منين؟ رد قائلا:  لو انتو معاكوش فلوس امال مين اللى معاه». بنبرة حقد صريحة كادت ان تشعل البيت نارا واحنا واقفين . 

العيال مغلبينك، وبس يا واد وهش يا بت وصفر فى اعمال السنة وخناقات وفضايح مع الجيران، فى الآخر عليك ان تعلم ان الأطفال يضحكون فى اليوم الواحد حوالى ٣٠٠ مرة بينما نحن الكبار غلابة نضحك ٣٠ مرة فقط، ده علميا لكن واقعيا ولا حتى ٣، يعنى فى النهاية ستحمل الهم ويضحكون هم.

فمن باب أولى تضحك معاهم. «دخلت على الواد ابنى « ٦ سنين» وهو بيذاكر، لسة هقعد على الكنبة لقيتها بقيت كاروهات كحلى مش دى كانت اصفر سادة! لسه هسأله لقيت التابلت مدهون كريم، سألته وعرفت انه لزوم التنظيف دهن التابلت مرهم تسلخات.

ابتسمت ولا لسة؟

أحب على ايدك الكلمتين قربوا يخلصوا. عارف ان البنزين غلى والغاز غلى والماية كمان، بس اضحك وخلاص لازم نضحك ما هو احنا مش أقل من كائنات تانية بتقدر تضحك، عندك القرد بيضحك والفئران على فكرة بتضحك وشركات المحمول برضو بتضحك..

علينا.

القبض تأخر!،

مخصوم منه!.

خلاص مش هقولك فرفش، لكن معلش دى مسألة إنسانية، حاول تفرفش كده وكده، يعنى مش بجد، أصل علميا حتى لو تصنعت الابتسامة «ايوه كده»، المخ لن يستطيع ان يفرق بين الضحك الحقيقى والمصطنع وسيساعدك هذا على تحسين حالتك المزاجية وستحصل حضرتك معنا على نفس المميزات الصحية والنفسية التى ستحصل عليها ان كنت تضحك بجد. وتبقى خدمتنى فى أكل عيشى.