الخميس، 28 أكتوبر 2021 - 05:27 م

عبد الصبور بدر

أكد عم محمد البقال أن فيلم «ريش» مش تمام، واتهم مخرج الفيلم بأنه قابض من بلاد بره على قلبه أد كده، وضحك على العيال فى الشغلانة، رمى لكل واحد 200 جنيه عُمى، ومضى كل ممثل على إيصال بـ 147 ألف جنيه، وعشان كده ربنا مباركلوش فيه، لأن «حسبى الله ونعم الوكيل» مش قليلة عند ربنا.
وحول القيمة الفنية للعمل، قال عم محمد البقال: «مافيش حاجة تعملك قيمة لامؤخذة غير الفلوس.. معاك قرش تسوى قرش..

ممعاكش متساويش، يعنى أنا مثلا بعمل أفلام على الزبون لغاية ما أطلع الجنيه من جيبه، وبنيت عمارة من الدكانة اللى انت شايفها دى.. بس ده كان زمان إنما دلوقتى كله شكك، ولو وريتك الدفتر هصعب عليك، وهتلاقينى مداين الشارع كله..

ميغركش كل واحد فيهم عامل فيها أفندى وبيه إنما هو مفلس ومحفظته فاضية، ومع ذلك مباحث التموين مش سايبانا فى حالنا».

وحول رأيه فى الفنانة دميانة نصار بنت المنيا قال عم محمد البقال «المنيا دى كنت بروحها كتير مع الوالد الله يرحمه، بنجيب عسل اسود من «البرجاية» لو تعرفها، شهد مكرر والناس كلها بتحبه، كسبنا منه كتير، كانت أيام حلوة عرفتنا بصعايدة جدعان، منسيوش العشرة، وبنود بعض لغاية دلوقتى، بس أنا بطلت أشتغل فى العسل، عشان الأكيلة بتوعه بقوا قليلين».

وعلّق عم محمد البقال على ما أثاره الفنان شريف منير من أن الفيلم مسئ لمصر قائلا: «مصر أم الدنيا.. والأوليا حامينها.. أنت عارف أم زغلول بتاعة الفجل اللى على أول الشارع.. جوزها رماها بعيالها الخمسة..

بس ولاد الحلال بيدوها اللى فيه القسمة.. ربنا ما بيسبش حد.. اشتكته فى المحاكم ماخدتش أبيض ولا اسود..

ولما ساقت عليه سيدنا الحسين وزارت المقام.. شوف اللى حصله.. التاكسى اللى بيشتغل عليه عمل حادثة.. وأبو زغلول عضمه اتفشفش، ومرمى فى مستشفى الدمرداش ولا حد بيسأل عنه».

وعن رأيه فى حصول «ريش» على جائزة أفضل فيلم عربى فى مهرجان الجونة إضافة إلى جائزة مهرجان «كان» قال عم محمد البقال «كان من يومين فى شاب غريب جانى الدكانة، أول مرة أشوفه فى الحتة.. خلى بالك أنا أعرف أصل كل واحد وفصله هنا..

سألنى عن الأسطى عريان الترزى، ففهمت بصنعة لطافة إنه عايز يخطب بنته..

ورغم إنى مش بطيق عريان ولا بيطيقنى لله فى لله، بس دى بنت حتتى.. قلت له فى ابوها درر.. وقرا فاتحتها».