مصر في حاجة إلي المخلصين وعلينا جميعا ان نعرف ان الدولة المصرية لو سقطت لا قدر الله كما يتمني لها الخونة ألا تقوم من جديد

ده كلام بجد مش فض مجالس..البلد دي لو وقعت مش هتقوم تاني..أعداء الوطن مازالوا حتي الان يحاولون إسقاط الدولة ولم يرضهم التقدم والنجاح الذي نحققه علي جميع المستويات..انا شخصيا لا اخاف ولا اهتز من شوية التفجيرات اللي بيعملها الارهابيين..الحقيقة التي يجب ان يعرفها الجميع ان الشعب المصري عارف كويس قوي ان كله نصيب ومكتوب..(ولما تسأل اي حد عن الأوضاع يقولك ياعم مفيش حد بيموت ناقص عمر)..يعني من الاخر كدة..تخويف المصريين بالتفجيرات والقتل مش بيرعبهم لأنهم شعب مؤمن بجد وعارف ان كل شيء يتم بارادة الله..ولكن هذا لا يعني اننا نجلس ونضع أيدينا علي خدودنا وننتظر موعد الانفجار القادم او مهاجمة القوات في سيناء..الموضوع باختصار اننا قبلنا اننا ندخل حربا مع عدو شرس جدا اسمه التنظيم الدولي للإخوان الارهابي.. هذا التنظيم كشف عن وجهه الحقيقي بعد ان نجح شعب مصر العظيم في الإطاحة بمحمد مرسي وعصابته من حكم مصر قبل ان يدمروها..تنظيم الاخوان يا سادة مش عاوز يصدق ان مصر بقي فيها استقرار وان الشعب بيحب الرئيس السيسي وان العالم اجمع اعترف بثورة الشعب وأننا سنفتتح قناة السويس بإذن الله خلال ايام.. هو عاوز ينكد علينا كل يوم علشان نحس ان اللي احنا عملناه كان غلط..ناس عبيطة..نقول أية يعني..خلو بالكم.. في الوقت اللي بيفجروا فيه كل يوم برج كهرباء اصبح لدينا فائض والحمد لله من انتاج الكهرباء.. وكمان كل لما يقتلوا اي مواطن الشعب بيزداد تماسكا وترابطا وده مجننهم رسمي..
اللي الشعب لازم يعرفه بجد اننا في حرب حقيقية بس حرب مع عدو عايش في بيوتنا وبياكل من اكلنا وبينعم بكهربتنا ومع ذلك كل يوم الصبح يقوم يفجر برج كهرباء وبعد كده يخرج يقطع الطريق علشان يطالب بعودة الكهرباء..بالذمة في قذارة اكتر من كدة..العدو اللي بيحاربنا يا مصريين نفسه نزهق او نتعب علشان يقول اننا انهزمنا بس ده مش هيحصل أبدا.. ولكن علينا جميعا ان نتعامل مع الوضع علي أنه حرب حقيقية وان نعلن تضامنا مع الجيش والشرطة في كل مكان وان نساند رئيس الدولة ليشعر الرجل أنه لا يواجه الاٍرهاب بالجيش والشرطة فقط وإنما بكل فئات الشعب..
الشهيد هشام بركات
حزنت لاغتيال النائب العام الشهيد هشام بركات وبعدها بيوم حدثت مذبحة سيناء وسقط العشرات من رجال القوات المسلحة البواسل في معركة مع ارهابيين خونة وفي وقت الصيام ولكن بفضل الله نجح الابطال في تلقين الارهابيين درسا أتمني ان تكون الرسالة وصلت اليهم وان يعلموا جيدا ان جيش مصر ليس جيش مرتزقة بيحارب مع اللي يدفع اكتر..الايام القادمة قد تشهد اغتيالات جديدة ومعارك في سيناء وهو ما يتطلب منا الا نترك لهم الامر يفعلون ما يشاءون وإنما علينا ان نكون اكثر وحدة ووعي ويقظة والا نتهاون مع العدو..كل مصري في هذه الأيام مطالب ان يدافع عن بلده بكل ما يملك لأننا في حرب حقيقية..مصر تحتاج منا جميعا ان نقف بجانبها بالمال والرأي والفكر والمساندة وألا نتركها تضيع من بين أيدينا من جديد.. دفعنا ثمنا عندما قررنا استرداد مصر واليوم سنكمل دفع الثمن لنحرم الأعداء من سرقتها مرة اخري..الجيش المصري يخوض حربا شرسة في سيناء وجنودنا البواسل يقاتلون ارهابيين .. هو ده الاسلام الحقيقي يا خونة يالي بتشمتوا في موت المصريين..علينا جميعا ان نتكاتف وبسرعة مع بَعضنَا البعض لنواجه الاٍرهاب الأسود الذي يطل علينا بين الحين والآخر بوجهه القبيح ليخطف منا أغلي واعز الناس.. مصر في حاجة إلي المخلصين وعلينا جميعا ان نعرف ان الدولة المصرية لو سقطت لا قدر الله كما يتمني لها الخونة لن تقوم من جديد وسنكون جميعا شركاء في السقوط لأننا فشلنا في الحفاظ عليها ورفضنا التوحد لمواجهة الخطر الكبير الذي يحمل لنا الشر في الداخل والخارج.. وكل عام والشعب العظيم في خير وسعادة وتحيا مصر.