معتز عبد المجيد
معتز عبد المجيد


نوستالجيا

الاحتواء

معتز عبدالمجيد

الجمعة، 12 نوفمبر 2021 - 09:31 م

 

كل حاجة حوالينا بتتغير حتى فى الكورة.. زمان كنا بنشوف متعة بجد ولاعيبة كتير اتظلمت وماخدتش حقها لا فى الشهرة ولا فى الفلوس علشان وقتها مكنش فى سوشيال ميديا ولا اعلام رياضى ولا برامج للتحليل قبل وبعد الماتش اللهم الا برنامج واحد كنا بنشوفه زمان على القناة الثالثة اسمه «الكورة فى الملعب» بيعمل لقاءات مع اللاعبين والمدربين بعد انتهاء المباراة.  


صحيح الكورة برا «طبعا» اتطورت فى كل حاجة..

فى طرق اللعب اللى بقت أسرع وبقينا نشوف معاها أهداف كتير..

شوفنا فرق خسرت بالتمانية والسبعة والستة والخمسة.. شوفنا معلقين من الطراز الاول يجبروك ان تتابع الماتش وتستمتع بتعليقهم..

شوفنا ثقافة الروح الرياضية وتقبل الهزيمة حتى ولو كانت بسكور كبير ومدربين ولاعبين بيسلموا على بعض بعد انتهاء المباراة..

شوفنا تطور فى التحكيم وفى قوانين الكرة آخرها «الفار» اللى اتعمل علشان يدى لكل فريق حقه..

شوفنا وبنشوف فى الدوريات الأوروبية كل مايتعلق بالمتعة الكروية، لكن الحقيقة مشوفناش فترة «الاحتواء» اللى تم اختراعها حديثا فى الدورى المصرى وتحديدا فى لقاء القمة 123 وكشف فيها حكم المباراة عن مشاعره تجاه نادى على حساب النادى الاخر واعتبر دا وسيلة للخروج بالمباراة الى بر الأمان.


ياكابتن مفيش حاجة فى الكورة اسمها احتواء وانك تيجى على فريق علشان الفريق التانى ميخرجش من الماتش وهو خسران بـ «سكور» كبير.. اللى نعرفه وبنشوفه فى الدوريات الاوروبية هو ان كل فريق بياخد حقه حتى لو كانت فى بعض الأخطاء التحكيمية بس فى الآخر الحكم مش بيخرج ويقول أصلى حسيت ان لاعيبه الفريق الخسران متوترين فقولت احتويهم.. احتواء ايه ياكابتن اللى بتقول عليه طب بالله عليك احتوينا احنا كمان وبطل تحكيم علشان فاض بينا الكيل.

الكلمات الدالة

مشاركه الخبر :

 
 
 
 
 
 
 
 
 

 
 
 

 
 
 

مشاركة