الجمعة، 31 ديسمبر 2021 - 06:16 م

بالونه بقالها خمس شهور عمالة تزيد وتكبر وتنفش ومش عاوزه تفرقع ابدا .. ولا تفش .. مواضيع واحداث جسيمة حصلت فى البلد تاخد وقتها وتخلص وتتنسى .. إلا موضوع رابعة ابتدائى برغم تفاهته .. إيه هى رابعة ابتدائى ؟ ممكن حد يقولى .. هل هى سنة بتحدد مستقبل الطالب ؟ طبعا لأ .. هل هى سنة فاصلة بين دخول الجنة والنار لا سمح الله؟ برضه لأ .. ولا علشان هى سنة فيها نجاح وسقوط .. طيب ما كل السنوات بعد كده فيها نجاح وسقوط !  يبقى ليه الدبكة والدربكة دى كلها وليه اولياء امور تلاميذ رابعة ابتدائى عاملين (الأزعرينه) دى كلها؟ اومال اولياء امور طلاب الثانوية العامة يعملوا ايه ؟
ويا ريت الامر اقتصر على الاباء فقط .. الاعلام كمان ماسك فى نغمة رابعة ابتدائى ما بين اعلام مؤيد واعلام معارض لتطوير منهج رابعة ابتدائى .. حتى البرلمان ذات نفسه نسى كل مشاكل التعليم فى مصر واغلبها فى التعليم العالى بالجامعات بالمناسبة وليست بالمدارس وتم استجواب طارق شوقى وزير التعليم بالبرلمان خصوصا فى موضوع رابعة ابتدائى !! بصراحة محرجة اقول ان الجنازة حارة ..والميت منهج رابعة ابتدائى .

ومن المضحكات المبكيات اننى اعرف آباء اولادهم فى التعليم الثانوى والجامعى  ومهتمين بالموضوع أوى ومعارضين بشدة لتطوير منهج رابعة ابتدائى !!  انا شايفة ان دراسة سلوك المصريين تجاه موضوع رابعة ابتدائى ستكشف عن الكثير من الفراغ. او السطحية لدى فئات من المجتمع بتحب تعمل من الحبة قبة.

وانا شايفة ان المرحلة الابتدائية هى الانسب للتجربة فى مناهج أو فى اساليب امتحانات جديدة.. لاننا سبق ان لُ منا وزير التعليم عندما جرب طرقا جديدة للامتحانات على طلاب ثانوى لانهم كبروا على نمط معين والتجربة فيهم تؤثر على مستقبلهم . والاولى ان يتم التحديث فى المناهج والامتحانات من الصغر .. فلما ييجى يجرب فى الصغيرين .. نرجع نقول لأ يا حرام دول لسه صغيرين !!

الظاهر ان عقولنا احنا هى اللى صغيرة .. وسواء كانت عقولنا كبيرة أو صغيرة .. كفاية اوى لحد كده ..  آن الاوان لبالونة رابعة ابتدائى دى انها تفرقع .. قبل مرارة حضرتنا ما تفرقع.