مايسة أحمد
خاص جداً
كتالوج السنة الجديدة
الأحد، 02 يناير 2022 - 02:29 م
سنة جديدة بتبدأ ولازم تكون مستعد لها..إزاى بقى؟؟ أقولك أنا.. أحلم.. أحلم أحلام كتير أوي وأطلب من ربنا يقويك ويساعدك، بس ماتقعدش بقى مستني النتيجة وإنت محلك سر، لا ياسيدي الفاضل أبدأ خطط وأتحرك وأسعى وشوف أكتر من طريقة عشان توصل لأحلامك، ولو لقيت حلم «معصلج» شوف غيره ماتضيعش وقت..
ونصيحة أوعى تسمع كلام حد يقولك أرمي اللي فات في السنة اللي خلصت ورا ضهرك.. لا.. كون ممتن للحاجات الحلوة اللي فيها وحط أي حاجة سلبية حصلت فيها قدام عينيك وخليها تكون حافز ودفعة للأمام، سواء لتغيير سلوك، أو لأنك تطور شخصيتك وتعاملاتك، أو حتى تنجح في شغلك بس بطريقة مختلفة.
إحنا عايشين عشان نسعى ونعمر في الدنيا مش زي الروبوتات اللي متبرمجة على حاجة واحدة وخلاص، أعمل كل اللي في نفسك بس ماتنساش ربنا وجنته، وكمان أعمل لنفسك مستقبل تفخر بيه.
بس خد بالك.. ماتخليش شغلك وطموحك ياخدك من نفسك واللي حواليك، أدي لنفسك دايما أولوية في الراحة والترفيه وصلة الرحم ومقابلة أصحابك، ماهو لازم نشحن منهم حب ودفا يدونا طاقة إيجابية تزقنا في وسط الضغوط دي.
وأهم بقى من كل ده، أدعي ربنا يديم عليك نعمة ويرزقك الرضا وإنه مايوجعش قلبك على حد من حبايبك أبدا، يارب إحنا وأنتم.
ياللا.. كل سنة وأنتم مبسوطين ومعافين وربنا راضي عنكم ومراضيكم أنتم وكل أحبابكم..
أهلا 2022.. أتفضلي برجلك اليمين..
الكلمات الدالة
الاخبار المرتبطة