الجمعة، 07 يناير 2022 - 05:34 م

أيام قليلة وتنطلق بطولة الأمم الإفريقية فى الكاميرون واللى أطلق صراحها بعد معاناة وتلميحات بإلغاء البطولة وصراع بين الاتحاد الإفريقى كاف وبين الفيفا.. المهم أن أهم بطولة فى قارة إفريقيا وتالت أقوى بطولة على مستوى العالم خلاص هتبدأ والحقيقة احنا كنا جيل محظوظ لأننا عشنا أهم فترة فى تاريخ منتخب مصر واللى فزنا بيها بـ 3 بطولات متتالية  مع المعلم حسن شحاتة بداية من 2006 حتى 2010 وزى ما كان بيتقال ساعتها ان منتخب مصر كان بينيم قارة إفريقيا من المغرب فعلا منتخبنا كان من أقوى المنتخبات فى القارة وقدر انه يوصل للمركز التاسع على مستوى العالم والاول إفريقيا وعربيا بعد مشاركته فى كأس العالم للقارات بجنوب إفريقيا 2010.. وكان حلمنا ان المنتخب دا يوصل لكأس العالم بس للأسف ولسوء الحظ لم نشارك.

المهم انا عاوز ارجع بالتاريخ لورا شوية واستعيد كمان ذكريات بطولة 1998 واللى فاز بيها منتخبنا تحت قيادة الكابتن محمود الجوهرى رحمة الله عليه.. فاكر ساعتها ان منتخبنا كان فى أسوأ حالاته وكان المتربصون بالكابتن محمود الجوهرى بيهاجموه وقللوا من فرص فوز منتخبنا بالبطولة.. وقتها الكابتن محمود الجوهرى تقدم بالفعل باستقالته لاتحاد الكرة قبل السفر إلى بوركينا فاسو الدولة المستضيفة، لكن المسئولين بالاتحاد رفضوا الاستقالة وقرر الجوهرى انه يتحدى الجميع واستخدم «خطة الخداع الاستراتيجى الكروية» وصرح بإن منتخب مصر يحتل المرتبة الـ 13 بين المنتخبات الإفريقية المشاركة وجهز فرقته وسافر بوركينا فاسو ورجع بالكأس وحقق البطولة الرابعة لمنتخبنا فى «الكان».

الخلاصة.. مش من الضرورية أن منتخبنا يكون فى احسن حالاته علشان يفوز بالبطولة اللى هتنطلق بعد أيام المهم ان اللاعبين يستعيدوا الروح والعزيمة واللعب بروح الفريق الواحد وبلاش نتخانق مين فى التشكيل ومين خارج القائمة ومين أهلى ومين زمالك.. الأهم هو أن المنتخب يكون مركز على الهدف ويسعى إليه وإن شاء الله يحققه.