الأربعاء، 19 يناير 2022 - 05:42 م

لست ممن يستقون معلوماتهم من السوشيال ميديا ولا ممن ينقلون عنها. لست أيضا ممن يستخدمون اللغة العامية فى كتاباتهم.. لكننى اليوم أجد نفسى مضطرا للتخلى عن هذه الثوابت لأننى مهتم جدا بجرائم السوشيال ميديا خاصة ما يتعلق منها بجرائم تشويه السمعة والإساءة إلى سيداتنا وبناتنا وصادفنى بعد مأساة انتحار بسنت فتاة الغربية بوست كتبه أحد مهندسى البرمجيات حول ما وصل إليه التطور فى جرائم السوشيال ميديا هو د.نور المعداوى وتناقله أعضاء بعض الجروبات المحافظة.. وأترككم الآن مع  ما جاء فى هذا البوست الذى يعترف كاتبه أنه لأول مرة يستخدم اللغة العامية بهدف أن يصل تحذيره إلى الجميع.. فماذا قال؟

معظم اللى هنا عارفين إنى مهندس برمجيات فاللى حا أقوله ده مش من وحى خيالى.. منذ وقت قصير قرأت حاجة كده قلبت تفكيرى ١٨٠ درجة واللى خلانى أعرف ليه صور بسنت انتشرت بهذه الصورة والناس صدقوها وابتلعوا الطعم وده موضوع الرسالة دي.
فيه خدمة، الخدمة دى مختفية.. بتقدم ايه؟
 أفلام اباحية مفبركة. ازاى بقي؟
الخدمة دى بفلوس ويعمل لك فيديو حوالى ٥ دقائق بما يعادل ٣٠ دولارا بعملة الإنترنت ال bitcoin كل اللى عليك أنك تدفع الـ٣٠ دولارا وتبعت صورة الشخص اللى عايز تعمل له فيديو اباحى لدرجة انه هو شخصيا يصدق انه هو اللى فى الفيديو! طيب ازاى ده بيحصل؟
أولا.. لها شروط يعنى لا يكون الشخص لابس نضارة ومش لابس حاجة على رأسه ويكون باصص للكاميرا بشكل مباشر و حاجات تانية علشان الكل يصدق.. ومش شرط فكرة ٥ دقائق للفيديو.. بل فيه عروض ثانية على حسب الوقت اللى انت عايزه عادى جدا ومش كده وبس.. لأ فيه خاصية كمان انك تجيب فيلم اباحى كامل وتركب صورة الشخص عليه بشكل ماحدش يصدق أن الفيديو ده تركيب.

فيه حد قرأت له بوست وقال إنه ماصدقش ده وافتكرها اشتغالة زى ما بيحصل فى الـ dark net وغيره فحاول يبص على  أراء الناس عنها اللى مكتوبة ولقاها كلها حلوة والناس بتشكر فيها فافتكرها أنها مزيفة برضه علشان صاحب الخدمة دى يروج لحاجته فالمهم الرجل دخل كلم حد من الناس اللى شكرت فى الخدمة وسأله عن الخدمة.. الرجل بقى أرسل له صورة شخص وأرسل له مقطع الفيديو الإباحى الأصلى وأرسل له الفيديو بعد التركيب.
الرجل اتصدم لما شاف المناظر دى ومش مصدق فقفل على طول.. واعتقد أن أى منظمة دولية حاتقفل الخدمة دى لأنها ستضر الكبير والصغير فاكتشف للأسف أن فيه hidden لخدمات ثانية بتعمل على تطوير محرك الذكاء الاصطناعى اللى بتعمل عليه الخدمة دى بمعنى أنها لو فى مرة اختفت ستظهر غيرها ١٠٠٠ واحدة بشكل تلقائى خاصة أن هذه الخدمة ليست على النت العادى الذى يستخدمه الناس.

أنا ليه قلت ده كله؟.. لما كنا زمان بنحذر البنات من أنهم يحطوا صورهن على النت كانت البنت بتتضايق وتفتكر اننا بنكبت حريتها! وأنا حاليا فى مجال البرمجيات أقول إن المجال ده لو حد استخدمه بصورة سيئة قادر يخلى كل واحد يقعد فى بيته وما يشوفش نور الشمس من خجله من الناس.. تخيلوا لما تكون بنت قاعدة فى بيتها معزرة مكرمة وتلاقى شباب منطقتها بيتبادلوا فيديو إباحى لها وابقى قابلنى لو حد أثبت أن الفيديو تركيب وحتى لو حد أثبت ده محدش حايصدق أن التكنولوجيا اتطورت لدرجة السفالة والإنحطاط ده!
الذكاء الإصطناعى مش صناعة إنسان آلى وبس الموضوع أكبر من كده بكثير.