الخميس، 20 يناير 2022 - 06:41 م

كفارة يا عم كيروش وصلنا وصعدنا لدور الـ١٦ بشق الأنفس فى البطولة الأفريقية أى والله  فبعد الخسارة من نسور نيجيريا..

فزنا مرتين بنتيجة واحدة ١/صفر على غينيا بيساو والسودان وحصلنا على ست نقاط وصعدنا فى المركز الثانى عن المجموعة الرابعة..

صحيح المستوى تعبان حبتين قول ثلاثة وموعد مباراتنا فى الدور القادم يوم الأربعاء..

فى مباراة لا تقبل الفوز إلا لفريق واحد إما نفوز ونعبر لدور الثمانية أو لا قدر الله نخرج ونعود بنتيجة مخيبة للطموحات والآمال فالمنافس فريق كبير وعنيد ويهدف زينا تمامًا للمنافسة على اللقب البعيد..

صحيح احنا فرقة عظمها ناشف على مستوى إحراز البطولات.. وفزنا بالكأس سبع مرات فى وش العدو..

لكن الكرة غدارة ولا تعترف بالحسب ولا النسب..

المهم أن مستواك ووضعك إيه النهارة.

خلينا نحمل طاقة إيجابية يمكن تفيد فى المباراة اللى جاية. ..أنا حاسس أن كيروش هيعمل لنا مفاجأة مدوية.. وهيلعب بالتشكيل اللى هو .. يعنى هيلعب بتشكيل مناسب لظروف المباراة ومناسب لحجم وطبيعة الفريق المنافس ..أمال أيه ..المباراة لا تحتاج لفلسفة.. ولا افتكاسات يا ناس..

هنلعب  بثقة ورجولة المصريين اللى شقوا قناة السويس الجديدة واللى بنوا العاصمة السعيدة واللى شقوا الطرق فى فمدن كانت بعيدة أصبحت الآن علينا قريبة عن طريق الصعبة والأوسطية إحنا ملوك الأوسطى .

صدقونى لو لعبنا بروح التفاؤل هنكسب وننافس على البطولة ..المصرى فى الملعب مالوش كاتلوج واسألوا المعلم شحاتة من ٢٠٠٠٦ إلى ٢٠١٠ كسبنا ثلاث بطولات فى أسعد الأوقات 

تحيا مصر