الجمعة، 25 فبراير 2022 - 07:03 م

ألبرت آينشتاين عبقرى الفيزياء الأكثر تأثيرا فى القرن العشرين كان ليه مقولة شهيرة بتقول: «لا تسعى للنجاح، وإنما كن ذو قيمة». بمعنى انك قبل ما تدور عالنجاح والشهرة والفلوس حاول انك يكون ليك قيمة فى مجتمعك ويكون ليك تأثير إيجابى على كل الناس اللى حواليك. فى أى مجال تقدر تكون ناجح لكن انك تكون شخصية مؤثرة او ملهمة دا بيحتاج لصفات خاصة وكاريزما صعب تقلدها والحقيقة مصر غنية بالشخصيات والرموز المؤثرة والملهمة اللى تركت بصماتها فى كل مجال يمكن تخيله تقريبا: من العلم إلى الفن إلى الاقتصاد والرياضة والثقافة وغيرهم. واستخدمت هذه الرموز كاريزمتها ورؤيتها لصناعة تغيير، والتأثير بشكل إيجابى على مجتمعنا وفضلت الرموز دى عايشة معانا وبتأثر فينا حتى بعد رحيلهم.

دلوقتى واحنا فى عصر السوشيال ميديا خرجت علينا مهنة جديدة أفرزها العالم الافتراضي، وهى مهنة «مؤثر» وظهر ما يسمون أنفسهم بأصحاب النفوذ أو المؤثرين على مواقع التواصل الاجتماعى «social media influencers» ومن المصطلح دا خرج اكتر من مسمى لكل من يدعى انه «مؤثر» ومن المصطلحات دى «instagrammers.. Snapchatters.. Youtubers.. Tiktokers»

وطبعا بعض هؤلاء «المؤثرين» وصلت شهرتهم إلى النجومية على مواقع التواصل الاجتماعى وحققوا مكاسب مالية وبالعملة الصعبة كمان لكن مش دا المهم.. المهم هو ايه المحتوى اللى بيقدمه هذا «المؤثر» لمتابعيه؟!.. شوية فيديوهات الغرض منها تجارى أو اعلانى لاكتر من ٣ ملايين شركة بتستخدم السوشيال ميديا للإعلان عن منتجاتها. كلمة «مؤثر» معناها كبير والهدف منها مش «سبوبة» فياريت منجريش ورا هؤلاء ممن يدعون على أنفسهم «مؤثرين» وهم بعاد كل البعد عن التأثير الذى نعرفه.