السبت، 19 مارس 2022 - 02:39 م

كشف الفنان الشاب عمر خورشيد أنه أنهى تصوير ثلاثة أفلام خلال الفترة الماضية لكنها في انتظار التوزيع خاصة في ظل كورونا.

وقال عمر خورشيد في تصريحات خاصة لـ«بوابة أخبار اليوم»: «أنا موجود وباشتغل وباحضر لأعمال جديدة وهناك فيلم باصوره، وخلصت بالفعل 3 أفلام بس لسة متوزعوش ودي خطة توزيع وكمان دخول كورونا بس الحمد لله كل ده انتهى لكن اتسبب في تأجيل طرح كل أفلامي ولما الأفلام بتتأجل بتاخد دورها بقى».

وعن اختفائه بعد نجاحه في فيلم «كاريوكي» الذي قام ببطولته قال: «أصابتني آفة الغرور بدون كبد وبدن مماطلة، وكنت بأعتذر عن الشغل وباتكبر على الشغل ودي رسالة مني لكل فنان شاب في بداية طريقه عمرك ما هتكبر لو اتغريت، وانا قدامك أهو كنت نجم والكل كان بيجري ورايا بقيت أرفض الشغل قالولي اقعد في بيتك».

وقال عمر: «عملت دور بطولة مع دوللي شاهين في فيلم عيد جواز، ومع ويزو فيلم ويزو سكول، وفيلم مسخ، لكن لسة مأخدوش دورهم في العرض والتوزيع، ودي أدوار بطولة، وحالياً بيتعرض ليا مسلسل "وجع البنات" ودا بطولة وفي دور في فيلم "براءة ريا وسكينة" لأنه يعتبر بطولة جماعية، وفي عمل تاني مش هاقدر أتكلم عليه دلوقت لحد ما يدخل في الجد».

وعن ذكرياته عن رمضان قال: «في ذكريات كتيرة قوي لكن إحنا نسينا الهدف الأسمى من رمضان وبدل ما كنا بنتنافس على العبادة والصلاة ومين قرأ قرآن أكتر بقينا نتنافس على مين شاف مسلسلات أكتر، وأنا مش بأقول منشوفش مسلسلات بس بلاش تاخدنا من المعنى الأساسي لشهر رمضان».

وعن ذكرياته مع عيد الأم قال: «كان عندي بدل الأم 3 خالتي ومامتي وجدتي، فكان عيد الأم بالنسبالي خراب بيوت، ودلوقت أنا كبرت وبقيت أشتغل وبقى عندي مامتي وخالتي ومراتي هما اللي بيفكروني، هتجيب لنا إيه في عيد الأم، يعني خراب بيوت عيد الأم طول عمري».

وهنأ عمر خورشيد الجمهور بشهر رمضان وقال: «كل سنة وانتم طيبين صومو وصلوا واقراوا القرآن واتمتعوا بالشهر الكريم».

وأكد في نهاية لقائنا به انه من عشاق «أخبار اليوم».