الجمعة، 08 أبريل 2022 - 07:26 م

مرة واحدة كدة.. هبت علينا موضة سخيفة فى بعض الصحف والمواقع الإخبارية، التى أشعر كصحفية قديمة أنها تعانى إفلاسا فى الأخبار، أو تراجعا فى حجم قرائها ومتابعيها وعزوفهم عنها، إما استشعارا من القراء والمتابعين بتفاهة موضوعاتها..

أو كذبها. فتجد خبرا مستفزا على موقع إخبارى أو جريدة كل كام يوم بيقولك: المصريون يستهلكون طعاما بـ ٨٠ مليار جنيه فى شهر رمضان!

المصريون شربوا ٦٧ مليار سيجارة خلال عام!! وأكلوا جمبرى بمليار ونصف مليار جنيه فى ٨ شهور !

المصريين اكلو تفاح بـ ٤٫٦ مليار جنيه خلال ١٠ شهور !

وآخر الافتكاسات من هذه النوعية أن المصريين أكلوا أربعة آلاف طن مكسرات خلال العام الماضي!! وبحسبة بسيطة لعدد السكان يطلع نصيب الفرد مثلا  ١٢ جنيها تقريبا لكل مواطن، ونص تفاحة فى السنة،  و٣٥ جراما تقريبا من المكسرات. يعنى ممكن يكون واحد أخذ قلب البندقة والمواطن الآخر أخذ قشرها !

والمصريون أصلا أغلب من الغُلب ومن أكثر شعوب الكوكب المطحونة،  وهم نفسهم المصريون اللى بيحتفظوا ببرطمانات المربى الفارغة لتخليل الخضراوات، أو وضع التوابل فيها، وهم المصريين اللى بيشتروا هدوم مستعملة من وكالة البلح نتيجة ارتفاع أسعار الملابس الجاهزة !

واللى بيلبسوا أولادهم الصغيرين ملابس أخواتهم الكبار توفيرا للنفقات، ولما تقدم يستخدمونها فى المطبخ، أو فى مسح البلاط، والعيش الفايض بيحمصوه فى الفرن ويأكلوه ناشف بحتة جبنة قديمة !! 

وإذا كان هدف من يخرج علينا بمثل هذه الأخبار أن يثبت أن الشعب يعيش فى إسراف وبذخ فأحب أقوله اخطف رجلك لأى بيت فى قرى مصر أو فى أحيائها الشعبية..

هتلاقى أسر كتير بتاكل اللحمة مرة فى السنة، وحاليا انضمت الفراخ لقائمة المحرمات فى بيوت الفقراء.
فاتركوا المصريين فى حالهم وبطلوا تعدوا عليهم اللقمة..

لأن اللى بتتحسب مابتتاكلش.

وإن كانت هذه الاحصائيات دقيقة أصلا (وأنا أشك فى ذلك) إن كان الهدف منها حصر الكميات المطلوبة لضبط معدلات الإنتاج والاستهلاك أو الاستيراد.. ولكنى اشتم فيها رائحة المعايرة للمواطنين..

فأحب أقول لمواقع أخبار  بير السلم ..

إن اللى أكل أكل من جيبه مش من جيب حضرتك..

وبطلوا تركبوا الترند على حساب المواطنين وبطلوا تحسدوا القرد على حمار وشه.