الإثنين، 11 أبريل 2022 - 05:36 م

ولا تزعلوا.. بلاها كيروش.. منقدرش نزعل السوشيال ميديا وهى فى إيديها العصمة.. تقرر ما تحب وقت ما تحب فى المكان الذى تحب.. خصوصا أن اتحاد الكرة لا علاقة له باتخاذ القرارات على اعتبار أن وزارة الرياضة بتفهم فى الكورة أكثر منه وتقريبا بتفهم فى كل حاجة.. بمناسبة إيه معرفش..

عموما أنا فى الأيام الأخيرة أصابنى الشلل بعد صدمتين من السنغال ولم يعد يهمنى أن يبقى كيروش أو يرحل واضطررت أركب المركب مع ثوار الميديا علشان نغرقها سوا.. لكن لما الاتحاد رمى يمين الطلاق بالتلاتة  فى وش المدرب ورحل معبرا عن سعادته بأيامه السودا إللى شافها معانا.. بينى وبينكم الراجل ''صعب عليا''.. يعنى فكرت شوية وقلت الراجل ده برضه لعب نهائى بطولتين.. وأقدام اللاعبين فى ركلات الترجيح هى إللى ضربته بالشلوت برة.. صحيح كان مزعجا لكنه كان منتجا.. بس إحنا لا مؤاخذة بيننا وبين الإنتاج سوء تفاهم واسترخام متبادل ..