الثلاثاء، 19 أبريل 2022 - 07:44 م

هاجمت الفنانة انتصار، شيماء سيف، بعدما قالت إنها تآمرت عليها من أجل إبعادها عن برنامج "نفسنة"، موضحةً: "سمعت إيه من كلامنا، دي محسساني إنها كانت في بنها وجات عدت من قدام الأوضة اللي كنا بنتكلم فيها عليها".

 اقرأ أيضا| صور | شيماء سيف وإسلام إبراهيم ضيفا أحمد فهمي في «أحلى كلام»

وأضافت انتصار، خلال حوارها مع الإعلامية بسمة وهبة مقدمة برنامج "العرافة"، على قناة "المحور": "هي عاملة مسلسل، وبتقول ماشية وعديت قدام الباب وواجهتهم وفتحت الباب، معندهاش حاجة تتكلم فيها في البرامج، وبتدور على أي حاجة تتكلم فيها، فمين مشهورة في حياتها عشان تتكلم عليها؟! انتصار". 

وتابعت: "طول النهار بسمع سيرتي في البرامج، طول النهار أسمع سيرتي ومش بعلق، مش برد عليها، اتكلمنا عليها في الغرفة، كنت بنتكلم على حاجة في الشغل، كنا بنقدم البرنامج 3 مع بعض، أنا وهي وهيدي كرم، مشاكلها كتير، وعشان كده طلعنا نتكلم، بتقطع في الكلام". 

وأردفت: "كنا بنتكلم على برنامج ومشاكل الشغل العادية، إيه اللي خلى مشاكل البرنامج تطلع في البرامج، أي شغل فيه مشاكله، لكن أنا شغلانتها، وطول النهار تتكلم في سيرتي، رغم إن البرنامج بقاله 5 سنين مش بيتعمل، ده لو جريمة كانت سقطت.. شايلة مني ليه؟! هو أنا مرات أبوها".