الثلاثاء، 21 يونيو 2022 - 06:12 م

لو أنت ربنا كرمك وتزوجت وتجاوزت مراحل البحث عن سكن .. التوضيب والتجهيز .. الشبكة و القايمة .. المهر والمؤخر .. ألخ، ظننت أن الصعوبات انتهت وستعيش حياة وردية تملؤها زقزقة العصافير وقررت إنجاب أطفال لبناء أسرة صغيرة سعيدة، هنا أحب أقول لك ركز واحسبها جيدا، ركز أن الطفل يولد فى شهر نوفمبر أو ديسمبر، استغربت اكيد .. وبتسأل ازاى وليه، ازاى أقول لك .. لو مش هتقدر تظبطها بنفسك شوف دكتور شاطر يعملكم حقن مجهرى، ليه؟ علشان عندما تقدم لابنك أو ابنتك فى مدرسة يكون سنهم 5 سنوات و 11 شهر أو 10 شهور وتضمن أنهم سيقبلون بالتنسيق، غير ذلك ستعيش مرحلة من قلق وتوتر ..

كعب داير على المدارس تقدم أوراق وتدفع فلوس «ابليكيشن» وتجرى مقابلات ويسألونك عن أشياء لا تخطر على البال.. أخيرا فى بعض الخطوات اللى يجب اتباعها فى العموم اثناء التقديم للمدارس، مبدئيا لابد ان تتقن اللغة الإنجليزية وكأنك تربيت وترعرعت فى شوارع نيويورك، ثانيا طفلك يجب ان يكون عنده القدرة على كتابة اسمه واسمك بالانجليزى ويكتب حروف اللغة العربية وحروف اللغة الإنجليزية والأرقام ويعرف أسماء الخضار والفواكه والألوان والأشكال الهندسية بالانجليزى، اجتماعى بس مش رغاى .. جرىء لكن هادىء الطباع .. ذكى ويلقطها وهى طايرة، أخيرا لا تنسى شراء ملابس جديدة وتهندموا نفسكم وتكونوا على «سنجة عشرة» ومع ذلك يا تقبل يا متقبلش وترجع تعيد الكرة تانى السنة الجاية وعليك خير.