الإثنين، 01 أغسطس 2022 - 02:38 م

كتب: هاجر عودة

"انا لسة على البر، وعارفة عيوبه طول فترة الخطوبة، لكن استوعبت خطورة الأمر من أفعاله بعد ما كتبت الكتاب، وقررت أني مش هكمل الجوازة غير لما ينفذ قرارته، وعشان ده صعب أنه يحصل، قررت ألغي الفرح وأرفع دعوى طلاق"، تحكي نور صاحبة 24 عاما وهي مشتته لرفعها الدعوى.

مش عارفه أخذت القرار الصح ولا لا، بس دي حياة مصيرية ومش هجيب حد يتعذب معايا وبعد كده اطلق وادخل محاكم، احنا نعرف بعض من الابتدائي، كنا في نفس المدرسة، بس عمره ماصرح أنه معجب بيا، لغاية مافترقنا وكل واحد دخل كلية شكل، دخلت فنون جميلة عشان بحب الرسم، واتخطبت بعديها وفشكلت، بس عمري ماتوقع أنه هيتقدملي، المشاكل بدأت من أول يوم شبكة، هو ولد على 5 بنات، باباه ومامته توفوا وهو صغير، والـ5 بنات أدوا دور الحموات، مش بيقدر يقولوهم لا على أي حاجة.

تستكمل نور: "الـ5 بنات متزوجات، لكن عايشين معاه في ملبسه ومشربه، وهما اللي بيخدوا كل قراراته، لدرجة إنه في شبكتي جابي دبلة واكتفي مع انهم أصحاب محل ذهب، لكن ده كله بسبب إخواته، انا عندي موهبة الرسم وهو كان مشجعني على ده، لكن اتغير بعد كتب الكتاب، ورفض فكرة الرسم". 

وتقول "كتابنا الكتاب وفاضل على الفرح شهر، روحت انا وهو عشان نحجز للفرح، فأنا كنت حابه فيلا الوزير وهو كمان، لكن مجرد ما رحنا قالي لا هعمل في فيلا خالي ومن غير أسباب، طبعا روحت قولت لبابا واتخانق معاه عشان ده مش أول قرار يرجع فيه، فقبل ما يفوت الأوان طلبت منه الطلاق وقفلت الفون بتاعي عشان ميوصليش".

اقرأ أيضا| زوج في دعوى نشوز: «قالتلي رايحة عند أمها ولقتها بترقص في فرح صاحبي»