الإثنين، 10 أكتوبر 2022 - 09:50 م

أعلن  محمد عادل «أمو» صانع ألعاب الفريق الأول لكرة القدم بنادي مصر المقاصة، اعتزاله لعب كرة القدم، بعد فشل انتقاله لأي من أندية الدوري الممتاز، خلال فترة الانتقالات الصيفية الجارية.

وكان«أمو» قد وقع على عقود انضمامه لنادي المصري البورسعيدي ووالإسماعيلي، الا أن الأمر لم يسر علي مايرام.

وكتب «أمو» عبر صفحته الشخصية على موقع التواصل الاجتماعي «فيس بوك»: «فاضل ساعات علي القيد وانا مخلصتش في اي مكان بعد ما مضيت في فرقتين مصري واسماعيلي وكنت بتعامل مع كل الناس بثقه كبيره جداً مضيت للمصري وفضلت منتظرهم يدفعو شيكات النادي ويخلصوني  انا مضيت للمصري قبل كابتن ايهاب ما يمسك الفرقه  اول حاجه قولتها لوكيلي  بعد كابتن ايهاب ما بقي المدير الفني قولتلو انا مستعد اتنازل عن اي حاجه بس اروح مع كابتن ايهاب اي حد يعرفني يعرف اني بحب كابتن ايهاب جلال جدا جدا وان كابتن ايهاب اكتر واحد ساعدني في حياتي .

وأضاف «أمو»، «قعدت اكتر من اسبوعين منتظر المصري يدفع الشيكات لما حسيت ان مبقاش في اهتمام من المسؤلين في المصري كلمت وكيلي قولتلو هروح اي مكان تاني قالي الاسماعيلي عايزك وانا بحب الاسماعيلي جدا جدا وافقت علي طول وقعدت مع البشمهندس يحيي الكومي  ومضيت واتفقت علي فلوسي وكانت المشكله فلوس النادي بس عملت كل حاجه ممكن اعملها قالولي هتستني علي فلوسك عشرين يوم قولتلهم مافيش مشكله عادي ادفعو فلوس النادي وخلصوني وانا مش هنختلف علي اي حاجه اللي حضراتكم عايزينه انا هوافق عليه عشان احقق حلم من احلامي والعب في النادي الاسماعيلي»

وأستكمل: «كنت مستعد اعمل اي حاجه عشان الموضوع يتم خلينا النادي بتاعي يوافق علي انو ياخد الفلوس اقساط مع ان النادي في ظروف صعبه ومحتاج كل جنيه يدخل النادي يكون كاش عشان يقدر يحل ازمته ويفك القيد عملت كل حاجه عشان الاسماعيلي يطلعو شيكات النادي وكانت كل حاجه فعلا كويسه اخر يوم في القيد قالو لوكيلي مش هنقدر نخلص عشان مافيش في النادي فلوس»

وأضاف «انا حالياً مروحتش نادي كلمت كل انديه الدوري كل الأنديه قفلت، القائمه بتاعتها ربنا يسامح كل الناس اللي كانت سبب في  اللي انا وصلتلو ده»

واختتم «انا قررت ملعبش كوره مره تانيه وبشكر كل الناس اللي حاولت تساعدني واتمني ميكونش في اي شخص زعلان مني وبشكر كابتن وليد هويدي والنادي بتاعي ربنا معاكو ويوفقكم وان شاء الله تصعدو مره تانيه..انا واثق جدا ان اللي حصلي ده خير وراضي جدا لكن لاسباب شخصيه انا مش هقدر العب كوره مره تانيه»
أقرا ايضاً|

الزمالك يعير ثنائي الشباب لفريق السكة الحديد