الثلاثاء، 11 أكتوبر 2022 - 10:15 ص

حلّت الفنانة شيرين عبدالوهاب ضيفة على الإعلامية إسعاد يونس، في برنامجها صاحبة السعادة، حيث ‏كشفت عن العديد من الأسرار عن حياتها الشخصية للمرة الأولى.

وقالت شيرين عبد الوهاب أنا بحب الـ20 سنة اللي مروا عليا منذ دخولي مجال الفن؛ لأنهم هما اللي عملوني وبحب الشقا اللي شقيته في البداية، ‏وبحب عزة نفسي ومع ذلك بسمع الكلام والنصايح، والحمدلله أنا ‏اتعلمت، واشتغلت مع أشهر الشعراء واشتغلت مع نصر محروس واستفدت منه وبشكره لأنه حطني على ‏الطريق والسلم".‏

وواصلت شيرين عبدالوهاب حديثها: أني كنت حاسة إن ربنا شايلي حاجة حلوة بس متوقعتش النجاح دا كله، ومتخيلتش إني هبقى ‏دولية وعلى مستوى العالم العربي، وأنا محظوظة إني بلاقي الحب من جميع الدول".‏

وأضافت: "أنا مدلعة أوي بحب الناس وحاسة إني بقيت مسئولة من الجمهور، وممتنة لكل شخص بيقابلني ‏في الشارع، واللي ربنا بيحبه بيحبب فيه الخلق، وبقول لجمهوري شكرا ليكم من غيركم عمري ما كنت هقدر ‏أرجع".‏

وأضافت شيرين عبدالوهاب أنني رجعت لحياتي وصحابي ورحت لـ سميرة سعيد البيت أبارك لها على أغنية ‏كرباج، ورحت لها لما اتعافيت لأني لازم أزورها وأنا حلوة ومقدرتش أشوفها وأنا جوايا طاقة سلبية".‏

وقالت الفنانة شيرين عبدالوهاب، إنها كانت تخشى أن يشمت فيها البعض من الأصدقاء عقب الانفصال عن زوجها حسام حبيب، مشيرة إلى أن جميع أصدقائها منحوها كل الحب والتقدير وساعدوها على الخروج من حياتها الصعبة.

وأوضحت شيرين عبدالوهاب قائلة: أنا لما بدأت أتكلم لقيت كل صحابي رجعوا تاني الحمدلله ووقفوا جنبي، وأنا بلوم نفسي كتير ف‏حلقت شعري بس حسيت إني غسلت نفسي.. ودلوقتي أنا أتولدت من جديد وبقيت مش باخد أي أدوية زي ‏زمان".‏

وعن سبب مبادرتها بالصلح مع المطرب عمرو دياب، أكدت أنها لم تقصد أي إساءة: "أنا صالحت عمرو ‏دياب لأني مقصدش أي إساءة، ومينفعش حد يعاتبني على كلام قولته في حفلة خاصة وكنت بهزر، وأنا ‏بحترمه وبحترم الجيل دا بالكامل، واتربيت على صوتهم وصوت إيهاب توفيق واتعلمت منهم الغناء، وأنا ‏رجعت لصحابي بنفسية حلوة".‏

وأكدت شيرين عبدالوهاب أنا مش حارمة نفسي من حاجة، ودخلت جوه شرنقة شيرين تاني، كل حاجة نفسي فيها بعملها، باخد منها حتة مش أكتر من حتة».

وعن سر نقصان وزنها، أجابت: «وزني تناقص عن مهرجان قرطاج بشكل كبير، لأن جسمي كان ممتلئا بالمياه بشكل كبير ولازال، لكن (كشيت) وتناقص وزني نوعاً ما».

أعلنت المطربة شيرين عبدالوهاب، أنها أغلقت باب الحب نهائيا، وتكتفي بكل الحب والتقدير من الجمهور الذي يعبر عن حبه لها دائما.

وأكدت شيرين عبدالوهاب، أن بنتيها يقدمان لها كل الدعم النفسي وبعتبرانها صديقة لهما ولست أم كباقي الأمهات.