الثلاثاء، 25 أكتوبر 2022 - 02:57 م

قال الرئيس عبدالفتاح السيسي، إن البنية الأساسية لتجهيز الأراضي للزراعة من أيام محمد علي ومن عام 1805 وإحنا طالعين ومكنش عنده مشكلة لأن المياه بتيجي من فوق ونازلة لتحت والحل بس يعمل قناطر وجسور  حسن الزراعة وبقى عندنا حوالي من 4-5 ملايين فدان، والدولة استوعبت المبلغ الخاص لتنفيذ هذا الأمر.

وأضاف الرئيس السيسي خلال الجلسة الختامية للمؤتمر الاقتصادي مصر 2022، أنه عند الحديث عن مليون فدان يتكلفوا 150 مليار جنيه وده كله علشان بس أزرعهم و150 مليار جنيه من أجل تجهيز مليون فدان ولأن الأرض اللي كانت بتتروي ري مريح خلصت وحتى محطات المعالجة نقدر نستفيد فيها بكل نقطة مياه وهل حد مستعد للاستثمار؟ مستعدين للاستثمار سواء داخل مصر أو بره مصر يصرف كده".

وأكد الرئيس السيسي أنه يجب كُره الفقر وعلى الجميع أن ينهض لتغييره، ولا يجب أن أكره سلوكيات الفقر، ولكن الفقر نفسه واستهدف الفقر ونغيره مع بعض، وأنا هقولكم على حاجة بالنسبة للمدرس، مافيش شباب يساعد مع مديريات التعليم في المحافظات للتدخل بشكل لطيف مع المجموعة الموجودة يشجعهم.. ما المرتبات تعبانة، أيوة تعبانة.

وأضاف الرئيس السيسي خلال الجلسة الختامية للمؤتمر الاقتصادي مصر 2022: "والله العظيم أنا بكلمكم من قلبي، أقل من 10 آلاف جنيه لأي حد بيشتغل، مش هيعيش، ما أنت هتقولي إديهم، هقولك يا ريت، هتقولي ما أنت بتتكلم عن ميناء بـ40 مليارا، أنا لازم أكون متوازن في إدارة الأمر، غيرنا كان مساره أكل، وشرب، ودفع فلوس وسابها لما بقت على الحديدة، وقولتلكم الإصلاح الموجود أكبر من قرار أي رئيس في الوقت ده، وبالتالي الناس خرجت هدمت الدولة، لأنها مش مستحملة تاني، فلا بد أن أشتغل على كل قطاعات الدولة".

وأشار إلى أن الناس في أوروبا بتغلي الكهرباء وفقا لتسعيرها، أنا عندي 17 مليون مشترك بديهم الكهرباء أقل من نص تمنها حتى الآن، مضيفاً أنني لو أقدر أساعدك هساعد الكل وبحاول أخلي اللى احنا بنعمله مفيد للمستثمرين.. أنا معاكم ومتوافق وداعم ومش كلام دبلوماسي.. مستعد لحوار شفاف وعميق مع أي حد في أي تخصص".

وأوضح الرئيس السيسي أن الموانئ التي تنفذ داخل مصر يتم طرحها للتشغيل للقطاع الخاص، أنا بقول للقطاع الخاص المصري أنت مستعد تدخل معانا، أنا خلصت وأنت مش هتتكلف حاجة، عايز تجيب تحالفات تشتغل معاك ومعانا.

واستكمل: "أنا بتكلم على اللي خايف على أصول مصر، ولما اتعمل الصندوق بتاعنا اتقال أنت بتبيع الحاجة وأصولنا! أنا جبت الموضوع بتاع الموانئ كموضوع نشوفه مع بعض، أنا علشان أعمل ده كنت هدخل في نقاش لمدة 4 أو 5 سنين علشان حد يجي ياخد، ولما ياخد يجيب تمويل علشان يعمل، وبعد ما يمول يبدأ يشغل، يعنى هأجل الشغل 10 سنين".

وتابع: "وقت العمل أنا ضاغط على الدنيا كلها علشان تخلص إمبارح مش السنة الجاية، إذا المسار المسئول عن الدولة لو لم ينتبه له، مش هيتحرك، الموانئ اللي بنتكلم عليها بطرحها تشغيل بس.. دي حاجتي.. عايز تخش تشتغل اتفضل، والكلام ده ينطبق على المطارات والبنية الأساسية للدولة كلها، والسكة الحديد".

ويختتم المؤتمر الاقتصادي- مصر 2022 فعالياته اليوم الثلاثاء، بعد أن ناقش أوضاع الاقتصاد المصري ومستقبله.

ومن المقرر أن تشهد فعاليات اليوم الأخير انعقاد جلسة بعنوان "خارطة طريق لتطوير قطاع الصناعة تحديات وآليات تحفيز القطاع" بحضور الدكتور مصطفى مدبولي رئيس مجلس الوزراء، والمهندس أحمد سمير وزير التجارة والصناعة، كما سيشهد اليوم عقد الجلسة الختامية للاعلان عن التوصيات التي تمثل خارطة طريق لمستقبل الاقتصاد المصري.

جدير بالذكر أن المؤتمر الاقتصادي نظِّمته الحكومة المصرية خلال الفترة من 23 إلى 25 أكتوبر 2022 بتكليف من الرئيس عبدالفتاح السيسي، رئيس الجمهورية؛ وذلك بمشاركة واسعة من نخبة من كِبار الاقتصاديين، والمفكرين، والخبراء المتخصصين.