الجمعة، 04 نوفمبر 2022 - 06:17 م

تخيلوا كده. هيحصل إيه لو أن الحكومة قررت ان تأخذ شكاوى الناس من سوء الخدمة التى تقدمها شركات الاتصالات مأخذ الجد،  وقررت الحكومة إلزام الشركات برفع جودة الخدمة للمشتركين وإلا ستتعرض لعقوبات وغرامات مالية شديدة !! 

وهيحصل إيه لو الحكومة فاجأت المواطنين فى كل محافظات مصر بوقف عمليات إزالة الأشجار التى تتم على قدم وساق من جهات غير معلومة !!
وقررت إنشاء حدائق عامة مجانية فى كل مكان فى محافظات مصر كلها، فيها ملاعب للأطفال ومساحات خضراء وكراسى محترمة وسمحت للناس بزراعة أشجار الفاكهة أمام بيوتهم لنشر الخضرة والجمال وعملا بشعار .. اتحضر للأخضر الذى ترفعه الحكومة !!

وهيحصل إيه لو قررت الحكومة إنشاء حمامات عامة فى كل منطقة أو ميدان فى مصر احتراما لآدمية المواطن وتشجيعا للسياحة، وتحقيقا للحلم الذى طال انتظاره من كل الناس؟؟
وهيحصل إيه لو أن الحكومة ألزمت جهاز حماية المستهلك بأخذ شكاوى الناس مأخذ الجد وفرضت غرامات كبيرة على الشركات المخالفة سواء التى تبتز الجمهور أو تبيع سلعا مغشوشة أو تقدم للمشترين  سلعا بخامات رديئة، على أن يطبق النظام على الجميع دون استثناء أى شركات !

وهيحصل إيه لو أن الحكومة قررت بالفعل اتخاذ خطوة جادة وحقيقية فى وقف تجاوزات التوكتوك، ومنعه من السير العشوائى فى شوارع مصر، واستبداله بمركبات محلية الصنع مرخصة بشكل رسمي، تعامل كسيارات الأجرة وتدفع ضرائب ورسوما ولها رخصة سير !!

وهيحصل إيه فعلا لو اشتغلت كل وزارة  شغلها بهدف تحقيق صالح المواطن بالفعل، وليس لتقليب جيب المواطن وفرض رسوم وجباية على كل ورقة أو معاملة بداع وبدون، فى سبيل أن يشعر المواطن باحترام الحكومة له ويبادلها الاحترام !!

عارفين هيحصل إيه لو كل ده حصل.... احتمال كبير الشعب يقع فى غرام الحكومة.... والأكيد أن المواطن  هيحب  بلده أكتر، وهيحس بانتماء وولاء للبلد التى حافظت  على حقوقه  ده بس لو حصل والحكومة عملت كل الكلام ده !!