الأحد، 11 ديسمبر 2022 - 11:34 ص

كشفت الفنانة أنغام عن حالتها الصحية بعد تعرضها لأزمة صحية مؤخرًا، حيث أكدت أنها كانت تجربة صعبة جدًا.

وأَضافت أنغام في أحد البرامج التليفزيونية، "أن أصعب لحظة مرت عليا عندما قالوا نفتح بطنها تاني نعمل استكشاف، ولكن دكتور واحد فقط من قال نفتح البطن ، ولكن دكتور وائل رفض وأصر عدم فتح بطني لأنها كانت اتفتحت قبل كده واستئصلوا الرحم".

وأكدت الفنانة أنغام  انه تم تركيب خرطوم الأنف للأمعاء وكان لابد ان يقوم الخرطوم بتسليك الأمعاء، وكان في احتمالية 80 % أنهم يفتحوا البطن مرة اخري ، وكنت بعيط، وخايفة جدًا ونفسيتي في الأرض".

وأضافت الفنانة أنغام  "اليوم اللي كنت بعيط فيه فجأة جم وشالوا الخرطوم ومتفتحتش بطني وبطني كانت قبلها منتفخة والأكل والمياه مبيعديش فيها وكنت بخاف أروح في النوم معرفش أتنفس، دي كانت لحظات ربنا ما يكتبها على حد".

وقالت الفنانة أنغام، " اللي عديت بيه ما كانش سهل وما عديتش بيه إلا بحب ودعوات الناس، أشكر كل الناس على دعمهم لي اللي صلوا لي واللي ولعوا لي شموع في الكنائس والأمهات الحلوة اللي دعت لي، وأشكر كل الزملاء ومن زارني في المستشفى، وأشكر أهلي وأخواتي وأولادي وأمي اللي تعبت نفسيا وجسديا".

الحالة الصحية للفنانة أنغام

قالت الفنانة أنغام "أنا حاليًّا في مرحلة التعافي ومجهدة شوية لإن هما خبطتين في الرأس، فتح جراحي ثم بعد يومين حصل مضاعفات قوية أخدت فترة أكبر من العملية وكانت أشد وطأة علي".

وأضافت أنغام "جسمي يتعافى شوية شوية والحمد لله، ما سألتش الطبيب عن مشكلة الالتصاقات اللي اتعرضت لها وما إذا كانت هتسبب لي مشاكل في المستقبل لأني بحاول أتفاءل، لكن اللي فهمته إن أي شخص بيفتح بطنه عن طريق الجراحة معرض للالتصاقات".

وأشارت الفنانة أنغام "ربنا ما يكتبها على حد إنه يعمل عملية جراحية في البطن وبعدين يعاني من مضاعفات والتصاقات وكنت ممنوعة تمامًا لمدة 10 أيام من الأكل والشرب وسمحوا لي في الأول بتناول السوائل الدافئة والأكل خفيف جدًّا وبعدين قالوا لي كلي، وبتعامل مع أمعائي زي الطفل اللي بيتولد من جديد، وكل شوية أقوم أتمشى علشان ما يحصلش مشكلة في ارتخاء أمعائي".

اقرأ أيضا| انغام عن أزمتها الصحية "حسيت إن وقع عليَّ بلكونتين مش بلكونة واحدة"
وأضافت الفنانة أنغام "حسيت إن وقع عليَّ بلكونتين مش بلكونة واحدة، الأولى العملية وبعدين شكرت ربنا على العملية وما أهملتش وبعدين حصل لي التصاقات في الأمعاء، وكان عندي حفلات في الكويت وحفلة مصر وكانوا أكبر همي لأن الناس كانوا اشتروا التذاكر حتى بعد لما عملت الجراحية كان عندي أمل أن أغني حتي لو أنا قاعدة علشان ما أزعلش الناس".

أنغام والغناء
قالت الفنانة أنغام "أنا بحب اللي بعمله ومتعتي الوحيدة الغناء وإسعاد الناس، لكن دي إرادة ربنا وحاولت ألتزم بتعاقدات الحفلات لكن ربنا ما أردش البلكونتين نزلوا علي".
 

أنغام والحسد والمرض 
قالت الفنانة أنغام "ممكن تكون عين وحسد بس أنا مش الناس اللي بركز خالص وبتوكل على الله ودايمًا القرآن شغال في أوضتي قبل التسجيل والتصوير، ودايمًا مستعينة بالله دايمًا وما عنديش الفكر بتاع الحقوني من الحسد وبحاول أتصدق وأفادي نفسي لكن فيه إرادة ربنا في الآخر، وإن شاء الله أقل من شهر وأرجع للمسرح لأن عندي حفلة في الكويت يوم 26 الشهر ده قبل رأس السنة".

رسالة أنغام لجمهورها
رسالة الفنانة أنغام لجمهورها "ربنا يحفظكم جميعًا وأشكركم على كل الكلام الحلو والدعاء والحب اللي أحاطني وكنت بحس أن ربنا يستجيب للقلوب الحلوة اللى بتدعي لي".

اقرأ أيضا | أنغام بعد وعكتها الصحية: عشت كوابيس صعبة