الخميس، 15 ديسمبر 2022 - 10:14 م

نشر الفنان رامز أمير فيديو من التدريبات النهائية لفيلمه الجديد "الجارح"، وظهر معه في الفيديو طائر "العقاب" وهو من أشرس الطيور الجارحة.

وعلق رامز أمير على الفيديو قائلًا: "أول حاجة وحشتونى جدًا وعارف إنى مختفى بقالى كتير بس هتعرفوا ليه لما تتفرجوا على الفيديو.

وأضاف، الناس اللى متابعانى عارفة أد إيه أنا بحب شغلى وأنى دايما بختار لنفسى الطريق الصعب اللى محدش مشى فيه قبل كده، وهى دى متعتى، انى اتعب لأن بالنسبالى التعب هو اللى بيدى طعم للحياة، بعد الأكشن اللى عملته اتقالى كلام كبير أوى عليا حملنى المسؤلية، فكان لازم اتعب اكتر واشتغل على نفسى أكتر، المرة دى أنا جايلكم بفكرة مجنونة حبتين، فيلم " الجارح "، الفيلم ده أخد منى مجهود وتعب لمدة سنتين، كانت الخطوة الأولى والأهم أننا نكتب فيلم محترم مش مجرد شوية أكشن وخلاص.

واستكمل، الخطوة التانية أنى أطور نفسى فى الأكشن أكتر وأدرب الطير اللى هيبقى مفاجأة فى الفيلم إن شاء الله، الطير الجارح ده اسمه العقاب وده من أشرس الكائنات اللى ربنا خلقها وتدريبه صعب وخطر جدا، ابتديت معاه من الصفر عشان أعلمه يقف قدام الكاميرا ويعمل أكشن معايا كمان، يمكن فى ناس تقول عليا مجنون بس الحقيقة إنى مجرد واحد بيحب يجتهد ويتعب، ربنا هو اللى ادانى النعمة دى و دى نعمة كبيرة أوى إنك تستمتع بالمشوار اللى بتمشيه عشان حلمك، الحمد لله.

وأكد، أنا وعدتكم انى هعمل اللى اقدر عليه عشان اكون قد مسؤلية تشجيعكم ليا و دعمكم، كلمة صعبة اوى لما الناس تقول عليا مستقبل الاكشن فى مصر، الجملة دى دايما كانت قدام عينى، و هى اللى خلتنى اشتغل على مشروع لمدة سنتين، عشان اقدملكم حاجة تليق بيكم و كل اللى بتمناه دلوقتى ان ربنا يقدرنا و نعرف نعمل نقلة فى السينما المصرية. 

وطالب الجمهور قائلًا: "دعواتكم واستنوا فيلم أكشن أول مرة يتعمل فى الوطن العربى فيلم "الجارح".

ولم يفصح رامز أمير عن تفاصيل الفيلم حتى الآن ومن المنتظر أن يفصح عنها قريبًا.