السبت، 31 ديسمبر 2022 - 08:55 ص

قال عصام الحضري حارس مرمى منتخب مصر والنادي الأهلي السابق: "قعدت أتنافس على رقم 1 لمدة 25 سنة، ونادر السيد أكتر حارس مرمى خلاني أغل على أي حد وأموِّت نفسي في التمرين، والفترة اللي جاء فيها في النادي الأهلي كنت مركز في التدريب بس وما بكلمش حد، وقلت لأحمد نادر السيد مشكلتي مع أبوك كانت المنافسة بس، وأحمد أحسن من نادر مليون مرة".

وأضاف عصام الحضري خلال لقائه ببرنامج “اللعيب” الذي يقدمه الإعلامي مهيب عبد الهادي بقناة “إم بي سي مصر”: "قبل بطولة أمم أفريقيا 2017 الكابتن أحمد ناجي قال لي أنت الحارس التالت موافق، وقتها عينيَّ دمعت لإني حسيت بالظلم، لإني كنت أحسن واحد، قلت له مفيش مشاكل واللي ربنا عايزه ليَّ هيكون بس أنا هحسبن وطلعت الأوضة بعيط بهستيريا، وتاني يوم الصبح قلت له أنا معاكم ولو عايزيني أشيل الجزم هشيلها، بعدها اتصاب شريف إكرامي في التمرين.

وتابع عصام الحضري: "وفي أول ماتش اتصاب أحمد الشناوي، وافتكر واحنا بنسخن الكابتن ناجي قال لي فك وشك فقلت له اللي ليك عندي التمرين مفيش كلام، لقيته بيقول لي فك وشك ما تعرفش إيه اللى ممكن يحصل بعد ربع ساعة، وفعلا الشناوي اتصاب فلقيته بيقول لي سخن علشان تنزل، وربنا وفقني وكرمني طول البطولة".

ولفت عصام الحضري: "محمد الشناوي بيذاكر ضربات الجزاء وأبو جبل بيأكد المعلومة عن طريق الكتابة على زجاجة المياه".

إقرأ أيضا|الحضري يعتذر لـ «ميكالي» .. مدرب الحراس مستمر في جهاز المنتخب الأولمبي