الأخبار

السبت، 31 ديسمبر 2022 - 08:44 م

يقدم الفنان هاني رمزي لقراء بوابة أخبار اليوم، توقعاته للأبراج خلال عام 2023، بطريقة ساخرة كوميدية، وبأسلوبه الخاص، حيث فسر كل برج وتفاصيله وتوقعاته في العام الجديد بطريقة ممتعة وشيقة يتخللها أسلوب فكاهي يمتاز بها الفنان هاني رمزي، وجاء اسم «فكلي منه فيه» على غرار أشهر أعمال رمزي الكوميدية فيلم «غبي منه فيه».

 

 

 

الحمل .. 

مبروك.. مبروك.. مبروك مبروك مبروك.. إفراج.. آه والنعمة زى ما بقولك، خلاص هتخرج فى السنة الجديدة من عنق الزجاجة اللى كنت محشور فيها، والفقر اللى كان راسه وألف سيف يجيب أجلك ويخلص عليك، مش هتشوف وشه تانى.

خلاص.. كان معمولك عمل بالنحس واتفك، ومن أول السنة لغاية شهر مايو هتلاقى نفسك فى حتة تانية خالص، جيبك عمران، وقلبك دفيان، وبدل ما كان حلمك تاخد الكرسى اللى جنب السواق لوحدك وانت رايح أول مكرم، هتسكن فى التجمع الخامس واللى مكنش طايق يبص فى وشك هيحتاج لقفاك.
وإذا كنت لسا متأهلتش ودخلت دنيا، هتقابل الحتة الناعمة، وترقص معاها فى ليلة العمر، وكل واحد يحضنك شوية، والكل يهنيك ويقولك.. مبروك.. مبروك.. مبروك مبروك مبروك.

الثور..

نفسى أعرف إنت عملت أيه لكوكب زحل عشان يوصى عليك السنة الجديدة، واضح إن أمك مش بتعمل حاجة فى حياتها غير إنها تدعيلك، هتقب على وش الدنيا يا فقري، بس فى كده شوية مشاكل هتقابلك، وكام حد مستقصدك، بس بعد ما تحس إنها خلاص قفلت فى وشك، هتفتح وتزهزه وربنا هيعوضك، أما لو كان معاك مبلغ مدكنه تحت البلاطة، طلعه واستثمر، هتكسب وتدعيلى.

امرأة الثور هتقابل الإكس وترجع الميه لمجاريها، ويكتب عليها، ورجل الثور كذلك هيقابل الحب القديم من تاني، ويسهروا سوا على الواتساب يبعتوا رسايل مليانة قلوب حمرا وايموشانات يتضحك، وهوب يلاقى هشام عباس بيغنى أسماء الله الحسنى وهو داخل بيها على الكوشة. 

الجوزاء..

لازم تعرف إنى فلكي، مش عفريت مصباح علاء الدين، وحتى عفريت المصباح مش هيقدر ينفذ لك طلبك اللى بتحلم بيه لأنه فوق طاقته، طبعا إنت عايز تخس، ومع ذلك عمرك ما التزمت بدايت، ولا بطلت تاكل من الشارع، ونازل فى التورت والجاتوهات والشكولاته فى أعياد ميلاد عيال صحابك بأيديك وسنانك، وبحذرك لو فضلت بالشكل ده مش هتلاقى حاجة تلبسها على مقاسك.

عموما الخبر الحلو إنك هتحتفل بنجاحات كتير هتحققها، وكل ما يزيد وزنك كيلو محبتك هتزيد اتنين فى قلب حبيبك، وبطلب منك تجهز جواز السفر عشان فيه سفرية حلوة مستنياك فى أول السنة الجديدة، وكمان مغامرة عاطفية على الصيف كده.. يا خلبووص.
 

السرطان.. 

طبعا إنت بالذات مش عايز حد يقرب منك، وشغال خناق طول السنة اللى فاتت مع دبان وشك، ومش طايق حد من كتر اللى اتعمل فيك، ولا حد طايقك بسبب عصبيتك، بس أحب أبشرك إن السنة عدت خلاص، والزهر هيلعب، وهتركب أول موجة فى سكة الأموال، وهتروح لأول حد احتاجت له فى سؤال، وكسر بخاطرك ساعتها ودوقك ضيقة الحال وتعمل معاه الصح!

بنت السرطان اللى بتعد النجوم هتعد الفلوس وتقابل حبيب الروح، وابن السرطان اللى مش لاقى يكمل لآخر الشهر، الشهرة هتمسك فيه، والدنيا هتبطل ترذل عليه، وبدل الشوريك هياكل بوريك، ويا أم نيازى صحى نيازى وقوليله حظ السرطان طلع فى العالى.
 

الأسد..

إنت أكتر واحد عارف إنك بق، هتفضل نفسك فى حاجات كتير وخوفك من حجات تانية بيمنعك إنك تحققها، مش عايز أرعبك، وأقولك ياريت تكون على حذر، أبوس إيدك بلاش تخطى من غير حساب، أوعى تغير طبيعة شغلك، ولا تخاطر فى مشروعات خسرانة، استهدى بالله وفكر كويس قبل ما تاخد أى قرار.

وإذا كانت فى عكوسات بتمنع التواصل بينك وبين حبيبك فى أول كام شهر من السنة بقولك متقلقش حبيبك لازق فيك ومش هيسيبك اتقل ياحج.

 

العذراء..

بقولك ايه شغل نمس بوند بتاعك ده مش هينفع السنة هتعملى نفسك ناصح وغامض وحويط مش هياكل الكلام ده مع ٢٠٢٣.

شوف.. انت محتاج فعلا تبعد شوية عن كوكب نبتون، لانه هيسبب لك ضغط كتير فى حياتك الفترة اللى جاية، تبعد إزاي؟.. أنا شخصيا معرفش.. وبعدين طالما عندك إمكانيات وقدرات اتلحلح ومتحطش إيدك على خدك وتشتكى من قلة بختك.. السنة اللى جاية هتصرف كتير، فى إيه؟..

برضو معرفش، بس هتصرف هنتصرف يعنى.. هتجيب منين؟.. لا.. متقلقش الفلوس هتنزل زى المطرة عليك، وأبواب السما هتتفح فى وشك.

 

الميزان.. 

مش عارف أقولك إيه يا عم الحنين انت، شغال طول السنة اللى فاتت تطبطب وتدادي، ووقتك مش ليك، واقف جنب الكل، ومع ذلك كل ما تقع متلاقيش حد يسمى عليك، والدنيا بتلطش فيك، اسمع بقا الأخبار الحلوة اللى شبه وشك البريء:فى السنة الجديدة هتودع الأحزان، والخوف اللى كان مالى قلبك من بكره هيلم شنطته وعلى أمه، والدنيا تروق وتحلى، عقدك هتتحل عقدة عقدة، ولياليك هنتنور وتصفى، وتلاقى نفسك بتقزقز اللب السوبر اللى بتحبه بس مش فى الصالة وانت بتتفرج على «أبو العربي»، لاااا..

على النيل وانت على الباخرة بتتفسح من بحرى لقبلي، إذا كنتى ست هتشترى الخلخال اللى كان نفسك فيه من الأقصر، وإذا كنت راجل هتجيب معاك وانت راجع كركديه وعناب وبلح مسكر.

العقرب..

ارحمنا ياعم من قلقك وتوترك ٢٠٢٣ سنتك إنت موهوب جدا فى كل حاجة، وبتعرف تدير أمورك صح، وعشان كده مكاسبك فى 2023 هتكون كتير وخصوصا فى الربع الأخير من السنة، ولو كنت رجل أعمال خش بقلب جامد وانت مطمن إن كله تمام الملايين جايه ومتنسناش، بس المطلوب منك كمان تبطل توتر وتفكير كتير، المهم امسك فى المدام ومتسبهاش وسيبك من الشيطان اللى بيحوم حوليك طبعا فاهمنى ولا اسيحلك.

القوس..

ماترسينى على الدور!.. إذا كان بينك وبين كوكب أورانس حاجة نقعدكم مع بعض، ونصالحكم؛ أورانس بيلف على كل كوكب شوية ويشتكي، ومخليهم شيالين منك، وبيألبهم عليك.

شوف بقا، أنا مش هفسر فى وشك وأقولك هيحصلك ويحصلك فى السنة اللى جاية، اسمع مني!..

انت بالذات حظك فى أيدك، هتبطل اندفاع وتهور هتفضل على وضعك، هتنشف دماغك الأمور هتفلت منك، صحيح المسائل هتمشى تاتا تاتا فى أول السنة بس فى آخرها هتلاقى نفسك وصلت لبر الأمان.

من ناحية النص التانى الحكاية هتتظبط على الآخر لغاية شهر مارس، انت عارف إن النص الحلو بتاعك بيحب جنونك، بس ياريت تحافظ على صحتك، وتاخد بالك شوية من نفسك، ومتخليش ضغوط الشغل تأثر عليك. 

الجدي..

أمور انت والله، وخسارتك فى الزعل والاكتئاب، بس عشان قلبك أبيض وربنا بيحبك، زحل والزهرة اتفقوا إنهم يسلفوك طاقة إيجابية تمشى بيها نفسك فى السنة الجديدة، فيا ريت قبل ما توزعها على اللى حواليك، تصرف منها شوية على روحك وتغير مودك، وتنبسط وتفرح زى مخاليق ربنا.

عارف إنت محتاج إيه عشان تحل مشاكلك؟..

إنك متركبش دماغك، وتسمع نصايح اللى بيحبوك، وتبطل اندفاع وتهور، عشان تنتصر على كل اللى بيحاول يجيبك الأرض، وتطير وترفرف فى السما.

فى حاجة كمان صغيرة قبل ما اسيبك، بلاش تفرد صدرك كده، وتلبس خفيف، نزلات البرد مش هتسيبك، وترقدك فى سريرك، وانت وراك التزامات متلتلة مفيش حد هيقوم بيها غيرك.
 

الدلو..

فى خناقة كده بين الكواكب وبعض، وعشان أنت ملكش في»اللبط»، وفى حالك، فأنت مهروس بين الرجلين طول الفترة اللى فاتت، كل المطلوب إنك تتسحب بشويش لا من شاف ولا من درى وتخرج من الليلة الكوبيا دي، إنت ابن ناس ومش ناقص بهدلة تانى والسنة الجديدة بتديك فرصة، المهم تستغلها وتنشط، وتبطل سهر للفجر وتصحى بعد العصر.

بتدور على شغل، دور كمان وهتلاقي، مش طايق مراتك وصوتكم جايب لآخر الشارع صالحها وكبر دماغك، ومشى أمورك، بقولك يا جدع السنة الجديدة بتاعتك، صفى أنت بس نيتك وكل اللى عايزه هتلاقيه بيتحقق لك، ترقيات، علاوات، فسح وخرجات، هيبقى معاك فلوس وتطلب اللى نفسك فيه إن شاء الله حتى بيتزا لارج، و10 كياس كاتشب.
 

الحوت.. 

برنس انت.. الكل بيضرب أخماس فى أسداس، وحضرتك ولا على بالك، ماشى فى طريقك ومطرح ما ترسى تدق لها، وعشان قلبك الطيب ده، أنا جاى من السنة الجديدة وبقولك إنها متفصلة على مقاس أحلامك، اتمنى انت بس وهى هتحقق لك كل اللى فى بالك.

من ناحية الحب، مش هكدب عليك، السنة الجديدة نسيتك، واسمك مش مكتوب فى كشف «النحنحة» أو السعادة العاطفية، بس ولا تاخد فى نفسك، وهما يعنى اللى حبوا مبسوطين؟!.. اهتم بروحك وارمى ورا ضهرك.