الإثنين، 20 مارس 2023 - 06:40 م

قبل كلاسيكو إسبانيا الأشهر الذي يشاهده سكان الأرض والمريخ وزحل والمشترى وعطارد.. شاهدت الدقائق الأخيرة من مباراة الحرس والمقاولون فى كأس الرابطة وظل المعلق يذكرنا بميلاد البطولة وهى كبيرة وعظيمة وعندها دلوقتي سنة واحدة ورغم كده بتمشي وتجري وتزعق وتنط الحبل.. ياسيدي ماشي مفيش مشكلة.. بس بصراحة المشكلة إنه كل شوية يفكرنا إن لو انتهت المباراة بالتعادل هيضطر الفريقان يا عيني يلعبوا وقتا إضافيا على شوطين.. ولما خلصت المباراة برضه كتر خيره كان مش عايزنا ننسى الوقت الإضافي وهو بيتفرج زينا من غرفة مش من الملعب..لكن فوجئنا ومعنا المعلق باللعيبة رايحة تسدد ركلات ترجيح.. ولا حول ولا قوة إلا بالله.

وبعد الكلاسيكو انتقلت لبرنامج رياضي فيه فقرة تحدثت فى بدايتها أخت عزيزة وقالت : ''طبعا أهم حدث عندنا دلوقتى هو كأس الرابطة''.. يعنى أهم من برشلونة مع الريال ومن استقالة أسامة نبيه وترحيل فيريرا ومباراتي بيراميدز وفيوتشر فى الكونفيدرالية واستعداد الأهلي لمباراة الهلال.. سامحوني على اللغة العامية وفركشة القواعد النحوية.. القافية ساعات بتحكم، والمرارة ساعات تشاور عقلها