الأحد، 28 مايو 2023 - 04:25 م

خرج الملحن هيثم نبيل، للتعليق على التصريحات الأخيرة للمحلن عمرو مصطفي خلال استضافته مع الإعلامي خيري رمضان.

وكتب هيثم نبيل عبر حسابه على موقع التواصل الاجتماعي فيسبوك"،: تعليقا علي حلقة عمرو مصطفى مع خيري رمضان.. عنده حق عمرو مصطفى يقول إنه محدش بينافسه لأنه خرج برة المنافسة من أكتر من خمس سنين كملحن لتوقفه وأنا من محبيه كمطرب ربنا يوفقه في اختياره الجديد إنه يبقي مطرب بيلحن لنفسه ولأم كلثوم.

وأضاف هيثم نبيل، "والحقيقة إن عمرو عامل حالة غنائية ناجحة لنفسه مؤخرا لا يغفلها أحد ولا يستطيع تقليل مجهوده.. الفترة اللي فاتت المنافسة فعليا بين أصدقائي الفنانين عزيز الشافعي وايهاب عبد الواحد ومحمد يحيي ومحمد رحيم ومدين وتامر علي وغيرهم من فنانين مركزين ونجاحاتهم بتتكلم عنهم دون التقليل من أعمال بعض وأثرونا بأعمال فنية راقية محدش يقدر يلغي نجاحاتهم بسبب تقصير شخصي.

وبالنسبة للفنان الكبير فنا ومقاما حميد الشاعري فهو اللي علمنا يعني إيه نعمل أغاني تسعد الناس في كل مناسباتهم علمنا يعني إيه بهجة موسيقية وأهميتها في نفسية الناس.. مش مطلوب إن كل فنان يعمل أغنية من غير ليه ومش معنى كده إن الأغنية الخفيفة (تافهه!! لأننا منقدرش نقول الكبير كبير تافهه ولحنها تافه لمجرد انها خفيفة الأغاني الخفيفة مايعرفش يعملها غير فنان تقيل لأن الأصعب إنك تفرح الناس والأسهل تعيطهم.. وكامل التقدير للمنتج الراقي والاستاذ الكبير محسن جابر لما نقول بابا يبقى يقدر تقدير الأب لكن بابا يتبعها تصريحات مفيهاش أي بابا ميصحش.. وهو فعلا أب للصناعة مقاما وسنا وتاريخ كبير لا يغفله أحد لا يصرح عنه إلا بعبارات تقدير وتكريم".

وتابع نبيل، "وأخيرًا غريبة إن عمرو وهو من أكتر الأشخاص تربص بالأشياء اللي بتجيلنا من برة لتدمير الثقافة والفن وإلغاء دور الفنانين إنه ما يشوفش إن Ai يندرج تحت الحاجات اللي تندرج تحت الظواهر اللي مقصود بيها إلغاء الفنان والإبداع البشري لغرض شخصي وهو إنه يقول أنا أقدر أعمل لحن لأم كلثوم يرضي غرور الفنان اللي جواه وده حقه في أنه ينافس ملحنين الزمن الجميل وفي الحقيقة إن الواحد ممكن يعمل لحن شرقي قوي جدا وهو نايم عادي مش الحدث يعني مش حاجة نادرة الوجود ولا حد هينبهر".

اقرأ المزيد.. أحمد سعد: اختياراتي مدمرة حياتي.. هل ندم على ارتداء الحلق وملابس شفافه؟