الثلاثاء، 30 مايو 2023 - 11:59 ص

آمنت بيك علشان لقيتك

شايفني صورة ملهمه

علشان مبروزني ..مرايه

وشايفني بيك

أنا بـ أنا

علشان بتقسم ضحكتي

على وجبتين

فاشبع هنا

زي الملاك

آمنت بيك ..عن من سواك

يمكن حضوري مش كتير

لكني حاضره

برقص بروحك جوا حضره

وبعزف اللحن السماوي

يمكن ما باقي من الزمن

حبة رغاوي

بتكتبني عمق

ومن قبل أحاديث السلف

والسيرة .. ودليل الحكاوي

بتفتح الصفحة تلاقيني

ع الوجود

آمنت بوجودك في عدمه

بدون حدود

آمنت بالتفاصيل

على جدار الأنوثه

ما انت اللي مشكل الخلق

بجيناتي جينات

لوحة بتكمل من فراغ

وتنزه البذره الرقيقه

من الرفات

وتعيد خلاص الكون

على إيدي بايدك

وترفع النور ع الطريق

فآمنت بيك كل الحالات