بوابة أخبار اليوم

الأربعاء، 31 مايو 2023 - 08:27 م

 

اللي فاكره من إبتدائي

صوت شاهنده ..

أبله عايده ..

شكل العصايا بتاعة الأستاذ أحمد رشاد ..

الحرب علي الدكه الأولي

وانا قاعد بتفرج دايماً

ومجاش فى خيالي  اني اتدخل

أو حتي أشارك يوم فيها  ..

الشله اللي ف أخر دكه

اللي بتتحكم ف الأحداث ..

مريلتي العِشره الصابره معايا لرابع عام ..

وحروف مش فاهم معانيها ..

طب  أحمد لطفي السيد مين

وازاي اسمه / علي مدرستي

ودروس  كات ساكنه ف كراستي

أنا بضحك دلوقتي عليها..

كل اللي أنا فكره اننا كنا

جيل طيب جدا والله

كان جد الجد ومش لاهي

وماكانش ف أيامنا تلاهي

عن كل جميل نبَّت فينا

تلاقينا مع أبلة فضيلة

او  ميكي وبطوط او بقلظ

اليوم المفتوح ع الأولي

أو تاكسي السهرة ونبقى تمام

من نادي السينما

 علي بكار ..

 الشيخ  الشعراوي ودرسه

لأ والدكتور مصطفي محمود

عربية الكشري مع الحمص

كيس العسليه ابو نص جنيه

الرضا بالحال

حتي ان كان صعب

المعنى الأصلي لكلمة حب

الجو العام كان طارح خير

كان ود ورحمه وليها كبير

كان فيه تقدير

لكبير البيت

وكبير الشارع

وكبير الحي وللأستاذ اللي بعِملهُ

 نوَّر ليالينا وأيامنا

حلو زمنا

والأحلى صبايا عيونهم روح

مش ممكن تلمحهم مره

يبصوا ع اللي ماهوش مسموح

البيت مفتوح

يستقبل رجعه شقيان علشان يرتاح

الوقت براح

بيكفي لقعدة طبليه

 حوالين الشال ويا الطارحه 

وحكاوي تغذي العقل عادات

وتروح ف الدم أوام سارحه

البركة بتنده للفرحه

وتعمر أركان الدار

الناس م الأخر كات صافيه

ونفوسها عمار

 الجار كان يشبه للجار

ف تقول أخوات ..

ونتوه مع غنوه بصوت الست

وندوب مع لحن أساسهُ بليغ

فيروز وحليم والسنباطي

وطوبار لو قال حته بياتي 

والشيخ رفعت والمنشاوي

وجاهين لو كان مع مكاوي

 بيخلوا الليله كبيره بجد

فتلاقي الجمعه ويوم الحد

قاعدين مع بعض علي الدكه

نفس السكه

هتلاقي القمح المبدور

م النجمه

واقف ف طابور

مستني حضور الزغاليل

هتلاقي النخل اللي لا يمكن

أبداً هايميل ..

واقف زنهار

يحرس ف نهار المعروف ..

هتلاقي كسوف..

علي وش الشجره اللي لا يمكن

تلاقيه مكشوف أبداً للغير ..

هتلاقي الطير..

واقف بيسبح وبيضحك ..

فرحان بيغني مع الساقيه

اللي بصوتها تسمع مواويل..

هتلاقي النيل..

واقف وبهيبه

بيوزع  روحه علي المخاليق ..

لو كات بتضيق

ف ب لمة أحباب راح تُفرج..

مليون مخرج..

لو عند فلان أصلاً أزمه..

هتلاقي الكل يكون حزمه

واوام تتحل..

هتلاقي الحل لأي سؤال

راح يشغل بال المحتاج ..

النور أمواج بيشيل العتمه ويمحيها

ويسيب ف خيالي أجمل ذكرى

مش ممكن هاتوه معانيها