حمدي موسى
حمدي موسى


«كام معلقة سكر».. قصيدة للشاعر حمدي موسى

بوابة أخبار اليوم

2023-05-31 08:38

أستأذن الوحدة شوية وجاي

نصاية يعني كدة

قيمة ماهعمل شاي

فيه حاجة سخنة قوي

 كاوية الضلوع جواي

الشعر يظهر طلع

وأوانه هل وطاب

القلب مال وانحني

يمة شعوري وجاب...

من قصة الأمس كلمة ..

وم الوجع جلباب

وفرش عيون القصيدة

 ف ضلة الأحباب

والسهرة صباحي

مااااااا أتعس الشعر لما

يجيني وانا صاحي

بنقضي ليل القصيدة

بين زعل وعتاب

واللي نقوله نعيده

ونعمله موال

استأذن الحب لو

يسمح سعادته سؤال

وفقت بين الأحبة

بدون كلام ازاي

اشرب ياعم الشاي

الليلة مش فايته

أكل الهوي الميتة

ف زمن مشاعر بور

أحسن نطفي النور

علشان نشوف روحنا

شامم عبير القصيدة

من عيون خضرا

حاسس بنفس المعاني

كأننا ف حضرة

 والبركة  في الأنحاء

هلت سيرتها شفاء

اتسعت الساحة

مدد يا أهل الوجع

يا حب بالراحة

وحياة مقام الجماعة

الطمعانين ف الشوق

خليني بس أدوق

أنا من هنا برضو

اتقل ياعم الليل

الشوق علي أرضه

الطاق بيبقي اتنين

خلينا ناخد من سيرتها بيتين

الفكرة مديونة

والبال عليه أقساط

والكلمة نازلة عياط

من قلة الصورة

والحالة  محصورة

بين الوجع والخوف

والمعني عنده ظروف

وعيونه مكسورة

الشعر يظهر كده

ناوي على موتي

أجرت له صوتي

فقال كلام لايجوز

ووصفها بأمانه

لما رمي الزهر

جاب الحب وخيانه

وزنقني في اليك

فك الشك م الخانه

بس الهوي محظوظ

فيه لسه دور محجوز 

ف العشرة للصدفة

يا شعر ياحانوتي

كفنتني بيها

ودفنتني فيها

وسألتني عن عيون

أنا شيخها ونبيها

فازاي أروح النار

بطل ياعم هزار

أحسن أطفيها

اقعد عوج ياجدع

 وقول كلام معدول

مش انا اللي كنت باقول

إنك اخويا شقيق

بس انت حد خنيق

 لكن ماليش غيرك

يا وشها التاني

ياعملة براني

عامل عليا حصار

بتقوم بدور سمسار

بتبيعني بقصيده

قلبى على حديده

 وعليا حب قديم

 قيمة الهوى بتنهار

كنا بنصنع حياه

تلتينها من أسرار

 والتلت من فكره

ارتفعت الأسعار

وصبح مفيش بكره

والدنيا عاوزه نهار

كام معلقة سكر

علشان تخف يا ليل

الوحدة خوفها طويل

والنار بقت عاده

من كترة الحزن

قالك مصر ولادة..

وانا آخر العنقود...

الكلمات الدالة

مشاركه الخبر :

 

 
 
 
 

 

 

 

مشاركة