صفوت ناصف

الجمعة، 02 يونيو 2023 - 09:49 ص

 

سواد الليل بيتحكم 

تملي فيا وف يومي 

بحس كأني شمعايه

 دايبه وحارقه ف هدومي 

انا السهرانه بستني

 اسمع كل يوم  حواديت

وبارجع تاني  بالذكرى

 أبص لنفسي ولحالي

 واقول معقول!!

وليلي يطول وانا التايهه

ف زنازين الحياه الواسعه  

ما كل الناس ولاد تسعه

وشايله غربتي وبسعى

 ادور بيها على الأيام  

فاسمع من بعيد صوتي 

ينادي علياف سكوتي 

يقول للذكريات موتي 

وانده تاني ع الأيام 

  تصاحبني الحياه مشاوير 

ما انا اللي عشت فيكي كتير

 ومش لاقي لا طول ولا عرض

 كتير أخشع واصلي الفرض 

وادعي ربنا ف سري

 كتير من عمرنا يجري 

وياخد كل شيء وياه 

وجوه القلب مليون أه 

أشوف نفسي كما مرايه يمر العمر 

ألاقي مرايتي مقلوبه

واقول للذكريات توبه

 من الحاصل وم اللي كان 

واشوف نفسي ف صورتي زمان 

كأني الملكه حتشبسوت 

كتير من عمرنا بيفوت

 ونندم تاني ع الأيام 

ونرجع للظلام والليل

 وأيام شوفنا فيها الويل 

هتبقي القصه مفهومه 

روايه ولسه مبتكملش 

وامتي هتكمل القصه 

علشان سن القلم مكسور 

بايدي أحرك الجمهور 

يقولوا اللي كتب فاشل 

مايعرف مين غياب وحضور 

حقيقي الدنيا دوارة 

بتكسر  شوكه المغرور