المتهمة والضحية
«س و ج».. أول مواجهة بين أساتذة الطب النفسي وقاتلة طفلها بالشرقية
الثلاثاء، 15 أغسطس 2023 - 12:54 م
كيف تجرأتي على قتل طفلك الصغير وتقطيعه؟
- كان معمول لي عمل مكنتش حاسة.
عملتي كده إزاي؟
- معرفش، كنت رايحة أنام لقيت نفسى رايحة على الولد جيبت إيد فاس خشب وضربته لقيته مبيتحركش، دخلت المطبخ جبت سكينة وبدأت أقطعه.
استخدمتي أى شيء تانى زي ساطور؟
- لا.
كنتي بتحاولي تخبيه ليه؟.. وليه حطيتي إيده جوا الدولاب وقطعتيه أجزاء صغيرة؟
- كنت تحت تأثير العمل.
مين عمل لك العمل؟
- مرات عمي ومرات أخويا.
عرفتي منين؟
- كنت بصلي وأدعى ربنا لحد ما عرفت.
عرفتي إزاى إنه عمل؟
- الشيخ قال خليكي قاعدة هنا وهاخد ناس وراح يحفرو طلعه.
كملتي تعليم؟
- لحد سنة خامسة.
بتعرفي تقري وتكتبي؟
- أه.
كنتي بتشغلي إيه؟
- باليومية في مصنع.
طليقك كان كويس معاكي؟
- لا .. كان بيضربني ويقول لي إن شكلي مش عاجبه.
طلقك إزاي؟
- روحت لمحامي ورفعت قضية.
انتي كنتي بتجري لنفسك ولا حد غيرك؟
- لا أنا.
أمك وأبوكي عايشين؟
- أمي بس.
بنيتى بيت بفلوس مين؟
- أخدت ورثي وعمي وقف معايا وخلانى أبني البيت
انتي ندمانة أو زعلانة على اللي عملتيه؟
- ندمانة.. بس أنا عيني من ضرب جوزى تعبت ومحتاجة عملية مبقتش ابكى كتير.
انتي فاهمة هيحصلك إيه؟
- أنا مستعدة أدفع دية أو كفالة بدل الإعدام.
لو موجودة لوحدك بتسمعى صوت حد بيكلمك او متخيلة حد عايز يأذيكي أو حد عايز يمشي وراكي أو يصورك؟
- لا.
كان إزاي رد فعل جوزك لما عرف؟
- كان بيزعق.
يوم الواقعة وبعد ما ارتكبتي الجريمة ظهرتي تاني يوم.. إزاى قضيتى الوقت ده وأكلتي إيه؟
- ما أكلتش.. كنت ببكي ونمت شوية وصحيت تاني أبكي، ولما عمى جه فتحت له شاف المنظر بلغ الحكومة.
لما خبطتيه ومقامش مجاش في بالك تتصلي بالإسعاف؟
- مجاش في دماغي.. ياريتنى عملت كده، اللي عملته خسارة ليا.
أبوه مكنش بيطلب ياخده؟
- كان عايز ياخده، قولت هجيب كتب وأعلمه في البيت وأحبسه مش هيلعب علشان مياخدهوش.
انتي مجنونة؟
- لا أنا معمول لي عمل.
الـ 100 جنيه فيها كام 10 جنيه؟
- 10.
كنتى بتضربي ابنك؟
- خفيف.
عمرك ضربتي قطة أو كلب أو فرخة أو موتيها؟
- لا خالص.. لو قطة دخلت بطردها.
مجاش ابنك قال لك هروح عند أبويا؟
- لا.. كان بيحب يقعد عندي.
طلب اللجنة
وطالبت اللجنة الخماسية من أساتذة الطب النفسي في جامعتي الزقازيق والمنصورة - المُكلفة بفحص سيدة فاقوس المتهمة بـ قتل ابنها الطفل وتقطيع جثته إلى أشلاء والأكل منها بعد طهي بعضها داخل منزلها بنطاق مركز شرطة فاقوس - بإجراء أشعة رنين على المخ للمتهمة وكذا إجراء رسم مخ للمتهمة لقياس النشاط الكهربي للمخ.
وأدت اللجنة الخماسية من أساتذة الطب النفسي في جامعتي الزقازيق والمنصورة، اليمين أمام محكمة جنايات الزقازيق في محافظة الشرقية؛ لفحص سيدة فاقوس المتهمة بقتل ابنها وتقطيع جثته وأكل بعضها، ذلك إيذانًا بمباشرة أعمالها في فحص المتهمة وبيان مدى مسؤوليتها عن الجرم الذي ارتكبته والباعث وراء الجريمة.
اقرأ أيضًا : بدء جلسة محاكمة قاتلة طفلها بالشرقية.. والمتهمة للقاضي: «الجريمة كانت غلطة»
وحددت محكمة جنايات الزقازيق في محافظة الشرقية، برئاسة المستشار سلامة جاب الله، رئيس المحكمة، وعضوية المستشارين هيثم حسن الضوي ويحيى عادل صادق، وشادي المهدي عبدالرحمن، وسكرتارية نبيل شكري، جلسة الثاني والعشرين من شهر أغسطس الجاري؛ موعدًا لاستئناف سابع جلسات القضية التي تحمل رقم 8619 جنايات مركز شرطة فاقوس لسنة 2023، المتهمة فيها سيدة فاقوس هناء محمد حسن بـ قتل طفلها وتقطيع جثته وأكل بعضها، حيث تضمن قرار المحكمة أن تشهد الجلسة المُزمع انعقادها إرفاق تقرير اللجنة الخماسية من أساتذة الطب النفسي في جامعتي الزقازيق والمنصورة التي قررت المحكمة عرض المتهمة عليها لفحص المتهمة ومدى مسؤوليتها عن الجرم الذي ارتكبته والباعث وراء الجريمة.
تعود تفاصيل القضية إلى شهر أبريل من العام الجاري، عندما تلقت الأجهزة الأمنية بمديرية أمن الشرقية إخطارا يفيد بورود بلاغ لـ مركز شرطة فاقوس، مفاده اتهام سيدة تُدعى هناء محمد حسن، تبلغ من العمر سبعة وثلاثين عامًا، ربة منزل وتُقيم في منزل على أطراف قرية أبو شلبي التابعة لنطاق مركز شرطة فاقوس، بقتل ابنها الطفل سعد محمد سعد، البالغ من العمر خمسة أعوام، وأكل أجزاء من جثته بعد تقطيعها وطهيها.
وجاء في أمر إحالة المتهمة هناء محمد حسن إلى المحاكمة الجنائية في محكمة جنايات الزقازيق بتهمة القتل العمد مع سبق الإصرار والترصد، أنها قد خططت ودبرت وأخذت الوقت الكافي لأجل تنفيذ جريمتها التي أقدمت خلالها على التعدي بالضرب على المجني عليها طفلها سعد ذو الخمس سنوات، وذلك لثلاث مرات متتالية بواسطة يد فأس خشبية، تبعتها بأن نحرت عنق الطفل وقطعت رأسه وفصلتها عن الجسد وقطعته إلى أجزاء أكلت بعضها بعد طبخه، فيما جرى ضبط المتهمة وأسلحة الجريمة، وذلك بعد ساعات في اليوم التالي من وقوع الجريمة لقاء بلاغ عم المتهمة للجهات الشرطية بشأن ما شاهده من أشلاء الطفل المجني عليه داخل منزل المتهمة.
الكلمات الدالة
الاخبار المرتبطة