أخبار الأدب

الثلاثاء، 19 ديسمبر 2023 - 02:50 م

مافيش وقت يا حلو!

الشمس من حبة حلوين

فارقت خط الزوال.

ضِلَّك اللى كان من ساعتين تحت رجليك

بقى أطول منك

وحسابك -لو تعرف- تقل!

ولياقتك ما عادتش زى الأول..

بتصعب عليّ حقيقى لما أشوفك بتزُك فجأة

بعد ما تاخدك السكرة وتمدّ زى زمان

وينغزك الألم فجأة فتتكرمش ملامحك

وتضيق عينيك

وتمسك شنطتك كأنها عكاز متعلق فى كتفك

كأنها صليبك وكنزك اليتيم...

اهرب!

قبل الوهم ما يكلبش برجليه رقبتك

ويجبرك تفضل شايل جسمه العجوز المقدد

حتى وانت نايم...

اهرب!

اسحب دراعك قبل ما تلهفه المفرمة!

اكتم أنفاس لهفتك لحد ما تحسها خرقة دايبة

ممكن تمسح بيها دموعك وترميها فى البحر!

ده أكبر خير ممكن تعمله لروحك

اللى هربدتها ملاعيبك المهبوشة

وسيِّحتها العيون اللى بتبخ نار

ونظرات كأنها سياخ مغروزة فى صدرك

بتشد قلبك عشان تشويه ع الصاج

وتمضغه على مهلها

لما ييجى لها مزاج!

اهرب يا صاحبى بجلدك

وأنا مستنيك هناك..

ع الشط القديم جنب الكباين المهدودة

ومعايا ألبوم صورنا من المهد

تعال نفرُّه سوا

ونشوف إزاى اتغيرت وشوشنا 

واتشقلبت الحكايات اللى بدأت عاقلة ورزينة

وانتهت فضايح مجلجلة

تعال نتفرج.. ونضحك

ونطيَّر الصور فى الريح

تعال..!

إقرأ أيضاً : سمكة زينة فى صحن الخلود:الفناء .. مغامرة شعرية