الخميس، 29 يناير 2026 - 07:56 م

أفكار كتير انتحرت
من أعلى مكان
فى المخ
والقلب رافض
يشتغل ويضخ 
كرات الدم لأجسادنا
واحنا جينا فى ميعادنا
يعنى مش متأخرين 
وانتظرنا الحنين
أربع ساعات
واكتشفنا إنه مات
والعزا كان ع المقابر
والبعض متحمل وصابر
ع الفراق ......
من لحم أحلامنا البريئة 
الحزن داق
ومافيش للألم ترياق 
النجوم من عيونها 
الدمع هاطل
والوجود عمال يماطل
رافض يسدد الديون
والصباح قرر يخون
ويساند العتمة 
رغم إنه أقسم
 زمان ع الختمة
والقسم أصبح فشنك 
لون المحبة بٍنك 
واحنا جينا من خيبتنا 
استبدلنا الدهب بالزنك 
ما تسيبشى حاجة تقع 
الفل مليان بقع
وايه اللى هينضفوا 
كل التماثيل في
متحف اللوفر
عجزوا وخرفوا
وبكرة اللى جاى 
بيقول لنا اتصرفوا 
وهو حزين كالعادة 
فرش الهوا سجادة 
ماكانتش أكيد حمرة 
بيستقيل الياسمين 
وفى ايده حتة جمرة