الخميس، 28 يوليه 2016 - 12:37 م

الفنان الرقيق محمد الشقنقيري كتب علي صفحتة بموقع التواصل الاجتماعي (الفيس بوك)  رسالة مهمة إلي اميرة الطالبة المتفوقة في الثانوية العامة أوجزت الكثير مما دار في انفسنا تجاه شابة لا تزال تعيش في نفق مظلم حتي بعد ان جلت كل الحقائق وانكشف الغطاء علي من عاشوا كذبة كبيرة وراءها مؤامرة علي وطن وشعب ولا يزالون يعيشون في سكة الخداع علي أمل ان يجدوا من يخدعونه من جديد.. قال الشقنقيري في رسالته :

«رسالة إلي أميرة» أميرة (الأولي علي الثانوية العامة) وبنت القيادي الاخواني المسجون.. ألف مبروك تفوقك وربنا يباركلك في نجاحك.. وعقبال الدكتوراة.

تأثرت جدا لما سمعت مداخلتك علي قناة الشرق الاخوانية مع المذيع محمد الناصر وانتي بتقولي (كان نفسي بابا يكون معايا ويشاركني اللحظات دي)!

فعلا معاك حق.. وجود الأب في لحظة زي دي مع بنته شئ لا يوصف ولا يعوض.. بس خليني احيلك حكاية أربع أميرات في سنك، هم كمان نجحوا النهاردة و.. بتفوق برضة.

١- الأميرة الاولي: هي كمان كان نفسها أبوها يكون معاها النهاردة، وتشوف دموع فرحته بنجاحها في عنيه بس للأسف استشهد في رفح وهو قاعد بيفطر ساعة الادان في رمضان.. وبالمناسبة يا أميرة انتي عارفة كويس مين قتل أبوها وليه وازاي.

٢- الأميرة الثانية: كانت بتحلم بحضن أبوها يوم نجاحها بس للأسف ابوها مات سنة ٢٠١٣ في انفجار مديرية أمن الدقهلية وكان ساعتها ماشي في حالة لابيه ولا عليه وراجعلها هي واخواتها بالعشا.. وطبعا يا أميرة انتي عارفة مين فجر المديرية باللي فيها ومين كان شمتان وبيزغرط ساعتها من الفرحة.

٣- الأميرة الثالثة: هي وحيدة أبوها وكانت قرة عينه بس للأسف ملحقش يفرح بنجاحها النهاردة لأنه مات في أحداث الاتحادية بعد ماولعوا فيه وسحلوه ع الاسفلت.. وبالمناسبة يا أميرة انتي عارفة برضه مين عمل كده في أبوها ومين سحله.

٤- الأميرة الرابعة بقا: طالبة شاطرة ومتفوقة زيك وطول عمرها بتحلم باليوم اللي تجيب مجموع طب وتفرح ابوها بس للاسف جابت المجموع ومفرحتش ابوها لأنه استشهد في مجزرة قسم كرداسة واتمثل بجثته بعد مارموا عليه مية نار، ومات ونفسه  في شربة ميه.. وطبعا أكيد يا أميرة انتي عارفة مين عمل في أبوها كدة ومين رمي عليه هو و١١ واحد غيره مية نار.

ايه رأيك يا أميرة.. ما تيجي نرجع لهم ابهاتهم دول ولو ساعة زمن واحدة يفرحوا فيها ببناتهم ويشاركوهم اللحظات دي وبعد كده يرجعوا وأوعدك ساعتها والدك هيرجعلك ويفرح معاك ويشاركك أحلي اللحظات وأوعدك ساعتها سيادة الوزير هيتصل بيك يهنيك.. وأوعدك ساعتها اننا مش هنزعل من كلامك اللي قلتيه عن رئيسنا.. وزي مانتي بتتمني رجوع بابا ربنا يخليهولك ويرجعهولك بالسلامة ويشاركك فرحتك و(عايشة علي الأمل) ده فيه أميرات غيرك كتير أوي بيتمنوا نفس الأمنية بس للأسف (عايشين من غير أمل).

مبروك مرة تانية يا أميرة!