الأربعاء، 31 أغسطس 2016 - 04:21 م

انت بتقول إيه يا قليل الأدب؟ هو اكمنى عجزت وكبرت فى السن ومقدرش أطبل يبقى ده معناه إنك تتريق عليا؟

حسينانت يابنى ياحسين.
- أيوه يابابا تحت أمرك.
- بتعمل إيه يابنى؟
- بذاكر زى ماحضرتك شايف كده.
- أنا عايز أفاتحك فى موضوع بس والله مانا عارف أبدأ منين.
- خير يابابا يكونش حضرتك عرفت بموضوع سهير؟
- سهير مين ياحسين؟
- سهير دى يعنى بصراحة أصلى...
- خلاص فهمت فهمت والله بتفكرنى بشبابى ياولد مكنتش بلاحق على البنات، واضح انه سهير دى هى المزة بتاعتك!
- بس مش أى مزة يابابا دى بقى إللى اخترتها علشان تكون شريكة حياتى بعد ماتخرج وابقى مهندس قد الدنيا.
- ماهو ده الموضوع إللى عايزك فيه.
- موضوع الجواز؟
- لا موضوع الهندسة، أنا باقولك كفاية دراسة لغاية كده وعايزك تدور على شغل يجبلك قرشين يساعدونا فى مصاريف البيت.
- كلام إيه ده يابابا أكيد حضرتك بتهزر، معقولة عايزنى أضحى بحلمى، ثم شغل إيه إللى حضرتك عايزنى أدورعليه ده يابابا؟
- أنا لسه قارى اعلان لنايت كلوب فى الغردقة عايز شباب من الجنسين بنات تشتغل رقاصات بمرتب 14 ألف جنيه وشباب زيك يطبلوا فى الفرقة بمرتب 8 آلاف جنيه!
- وحضرتك حاتيجى تطبل معايا؟
- (طرااااااااخ) انت بتقول إيه يا قليل الأدب؟ هو اكمنى عجزت وكبرت فى السن ومقدرش أطبل يبقى ده معناه إنك تتريق عليا؟
- بتضربنى بالقلم على وشى يابابا؟
- متقولش بابا.
- يعنى إيه ماقولش بابا تقصد إيه؟
- ماقصدش يابنى بس انت خرجتنى عن شعوري.
- مش قادر أصدق يابابا طبال؟ عايزنى اشتغل طبال؟
- الطبل مش عيب يا حسين وأديك شايف اعلاميين كبار مش بيعملوا حاجة غير التطبيل ليل نهار وهى دى الحاجة اللى بتجيب فلوس دلوقتى!
- طيب طالما فيه اوبشن أنى ممكن ابقى طبال فى الإعلام ليه حضرتك عايزنى أطبل فى نايت كلوب؟
- لأن طبال النايت كلوب اشرف يا حسين، على الأقل بياكل من عرق جبينه!.
بس يابابا أنا بحب الهندسة وطول عمرى باحلم ابقى مهندس وحضرتك وماما من وأنا فى ابتدائى بتقولولى ياباشمهندس.
علشان كده ياريت لما تتجوز وتخلف اوعى تقول لعيل من عيالك ياباشمهندس ولا يادكتورة!
اومال أقولهم أيه أقول للولد ياطبال والبنت يارقاصة علشان أزرع فيهم حب الفن من هم وصغيرين؟
ده الحل الوحيد علشان تقدروا تواجهوا مصاريف الحياة.
مصاريف الحياة تخليك تتخلى عن مبادئك يا رجل المبادىء؟
- (طرااااااااااخ) انت زودتها أوى يا كلب.
- تانى بتضربنى وكمان بتقولى يا كلب؟ أنا نفسى أعرف ليه المعاملة دى هو أنا مش ابنك؟
- لا مش ابنى!
- بلاش هزار سخيف يابابا!
- هى دى الحقيقة يا قليل الأدب انت لقيط عارف يعنى إيه لقيط يعنى جايبنك من الملجأ إللى آخر الشارع!
- بس أنا مليش مكان غير البيت ده ولا اعرف أب غيرك ولا أم غير احسان هانم ولا أخ غير أخويا احمد ولو طردتنى من هنا ممكن أتشرد فى الشوارع.
- خلاص انا حاسمحلك تقعد معانا بشرط واحد، أنا أصرف عليك أكل وشرب ودروس لغاية لما تتخرج وكل اللى عليك تشوفلك شغلانة بعد الضهر تدبر منها تمن فاتورة الكهربا!
- يا محمود بك أنا باشكرك لغاية كده واسمحلى أخد هدومى وأمشى من هنا!
- هاتطلع على الغردقة طبعا يا حسين؟
- لا سيادتك أنا راجع الملجأ إللى آخر الشارع!