الخميس، 01 سبتمبر 2016 - 03:47 م

يا عالم.. يا هوووه
معقول يكون وزير التربية والتعليم د.الهلالى الشربينى فاكر ان»شوية» القرارات الأخيرة اللى أعلنها.. هى اللى هتطور التعليم وتحسن مستوى التلامذة.. أو حتى هتخلينا نقف على أول الطريق ؟!!
معقول يكون فاهم ان تغيير حساب الدرجات هو المشكلة.. أو انه لما يلغى امتحان الميد تيرم ويبدله بامتحان الشهر هو ده اللى «هيعدل المايلة» ؟!!
طب ما احنا كنا كدة الأول؟!! وجاء الوزير اللى قبلك وشاف ان الميد تيرم أفضل.. وهييجى الوزير اللى بعدك يرجع الميد تيرم تانى !!
وفى كل مرة وكلاء الوزارة وخبراء التعليم الملاكى عندهم المبررات النظرية المجعلصة لقرارات وزيرهم.
واحد من كبار المسئولين بالوزارة يقول لك: «الهدف من إلغاء امتحانات الميد تيرم لطلاب التعليم الأساسى واستبداله بامتحانات شهر.. هو تواصل التقويم المستمر للطلاب طوال العام الدراسى ووسيلة لقياس المستوى المعرفى والعلمى لهم».. طب ده التلامذة بيشتكوا اساسا من عدم قدرتهم على التحصيل والفهم وغياب التواصل التام مع الأساتذة.. يبقى هنمتحنهم ونقيّمهم ونقيس مستواهم العلمى والمعرفى على أى أساس؟!!
أكيد الوزير ووزارته والبلد كلها.. فاهمين وعارفين ومتأكدين..ان المشكلة مش فى تخصيص حصص فى الجدول للكمبيوتر والرسم أو الألعاب أو الأنشطة الزراعية والصناعية.. لأن كلنا برضه فاهمين وعارفين.. ومتأكدين أن الحصص دى على الورق فقط.. وان مفيش مكان فى المدارس لتدريسها.. ولا فيه أعداد مدرسين كافية.. ولا فيه وقت أصلا.. والدليل على كدة ان الكمبيوتر فى المدارس من سنين طويلة.. لكن مفيش طلاب بيتخرجوا عندهم مهارات الكمبيوتر.. وان المناهج كل سنة بتتعدل وتتغير.. ولسة مفيش تعليم.. وان اللغات بيتم تدريسها من مرحلة الابتدائى.. لكن الطالب بيتخرج من الثانوية العامة ميعرفش انجليزى ولا حتى عربى!!!
والسبب بكل بساطة أن المشاكل الكبيرة.. الخطيرة.. المكلكعة لسه موجودة.. وهى زحمة التلامذة فى الفصول.. بسبب نقص المدارس ونقص المدرسين.. ومع الزحمة والكثافة.. مناهج معقدة حتى على المدرسين نفسهم.. والوزير سايب كل البلاوى دى.. وبيتكلم فى الأنشطة.. وتوزيع الدرجات.. وعدد الامتحانات.. واحد والا ثلاثة!! يعنى من الآخر احنا بنضحك على بعض.. وكل هدفنا هو الشو الإعلامى.. علشان يبقى اسمنا عملنا حاجة والسلام.. خاصة اننا داخلين على موسم تغيير.. وكل سنة وانتم طيبين !!