الإثنين، 05 سبتمبر 2016 - 02:49 م

حفيظة: قوم يا هبل يا بو ريالة هات لنا الأضحية فاضل كام يوم على العيد
عتمان: يا وليه الليالى جيه.. ماعندك الزريبة مليانة جاموس وبقر وخرفان
حفيظة: مش بقولك انت كبرت وخرفت والبت فاطنة كلت عقلك.. الكلام ده كان زمان أيام العز والبغددة.. دلوقت كل شيء بنشتريه مجمد من الجمعية الاستهلاكية وحتى العيش بنجيبه من الفرن
عتمان: يا وليه كلام إيه ده وهو أنا نمت كام سنة
حفيظة: والله ما عارفة المهم الأضحية لـ «ادبحك» مكانها وأنا قد قولي
عتمان: يا حفيظ يارب جيب العواقب سليمة.. خلاص قايم أجيب الأضحية بس منين
حفيظة: فاكر أبو العلا اللى انت ضحكت عليه وجبرته إنه يطلق مراته وتجوزتها بقى تاجر كبير.. من خيرك يا هبل من اللى بتسرسبه له فاطنة.. عنده شادر عقبال عندنا مليان جواميس وبقر وخرفان كمان
عتمان: والشادر بتاع الواد المخفى أبو العلا ألاقيه فين
حفيظة: فى كل شارع تلاقى زريبة ملانة..  لا بشر ولا عربيات بيعرفوا يعدوا.. روح يمكن جاموسة ترفسك وأخلص منك
عتمان: طيب بس ده خسارة ليه ما ندبح فرخة ولا وزة ولا بطة من بتوع زمان
حفيظة: وزة وبطة وده عاد ينفع للعيد يا عمدة انقطع ندره.. خلى بالك الخرفان قايم بـ 38 جنيه فى منافذ الزراعة وعند التجار بـ 41 جنيه.
عتمان: طيب والله معقولة قوى أروح أجيب خروف من أبو  38 جنيه وآجي
حفيظة: انت اتهبلت يا راجل فى خروف فى الدنيا دلوقتى بـ 38 جنيه بقولك الكيلو فاهم ولا لأ
عرفان: يا لهو بالى الكيلو الواحد دا أنا زمان اشتريت فدادين أرض بأقل منها
حفيظة: يا سلام يا فالح يعنى إنت ما سمعتش اللى حصل للجنيه قدام الدولار
عتمان: لأه إيه اللى حصله
حفيظة: اللى يحرسه ويعمر بيته طارق عامر محافظ البنك المركزى عوم الجنيه بقى الدولار الواحد بييجى 9 جنيه رسمى أما السعر الخصوصى فى السوق السودة بأكثر من 12 جنيه
عتمان: وده يبقى عومه دا غرقه
حفيظة: ما أنت جاهل تعويم الجنيه مش فى الميه دا فى الهوا يعنى قيمة الجنيه قلت يا أبو عقل بلوظة
عتمان: طيب يا فالحة وإيه علاقة تعويم الجنيه بسعر الخرفان
حفيظة: هو الخرفان بتاكل إيه مش علف أهو غلى سعره عشان بنجيبه من بره وبالدولار
عتمان: با قولك ملعون أبو الدولار لا أبو الجنيه أنا هشترى كام كيلو لحمة وخلاص
حفيظة: وهى اللحمة بقت رخيصة دا الكيلو عند الجزار بأزيد من حته بمية وفى مجمعات الحكومة شغتة وجايبنها من بلاد بره بـ 60 جنيه
عتمان: يا حفيظة بقى كيلو اللحمة بميت جنيه طب والله منا رايح هجيب ده كله منين
حفيظة: معرفش اتصرف زى مضيعت فلوسك و100 فدان بتوعى على الجواز العرفى ده اتصرف وهات الأضحية
عتمان: طب فكرى معايا يا حفيظة يا بنت الأصول.. أعمل ايه
حفيظة: نقولك وناكل من بيوتنا.. روح اشتغل عند أبو العلا يمكن يرضى
عتمان: يا عيب الشوم يا حفيظة على آخر الزمن اشتغل عند المخفى ده والناس تقول على إيه.. متنسيش انى العمدة برضه
حفيظة: يا راجل العمدة كان زمان.. دلوقت العشرة منهم بقرش
عتمان: لأه لما اموت من الجوع مش هروح للمخفى ده أنا هروح أسوق توك توك أهى مليه الشوارع وبتفوت حتى من على الرصيف وحتى من فوق الناس
حفيظة: يا راجل بص فى المراية هو فى توك توك على مقاسك
عتمان: بتتمسخرى على يا حفيظة طيب أنا قدامك أهه اعملينى أضحية
حفيظة: يفتح الله وهو فى حلة على مقاسك يا ضلالي
عتمان: ياخراب بيتك يا عمدة هلاقيها منين ولا منين فواتير النور ولا الميه ولا لبن الأطفال للواد ابن فاطنة وأنا مفييش حيل أقف فى الشمس قدام صيدلية الاسعاف
حفيظة: حد قالك تتجوز على دا أنا سمعت كلام نظيمة وقعدت تحت القطر وعدى على عشان أجيب لك الواد
عتمان: قلبك اسود يا حفيظة نامى بقه يمكن ربنا يرزقنا بخروف حتى لو أوزى.. «هى حبكت»