هشام مبارك هشام مبارك

احم احم !

شهرزاد الزملكاوية «سابقا» !

هشام مبارك الأربعاء، 16 أكتوبر 2019 - 08:26 م

ذهب الأمير شهريار ومجموعة من حاشيته وأصدقائه فى رحلة صيد طويلة استمرت عدة شهور ولما عاد دار بينه وبين شهرزاد الحوار التالى:-
- حمدالله على سلامتك يامولاى،معقولة نهون عليك تبعد عنا كل الفترة دى،سلامات ياسيدى سلامات شوف سافروا معاك كام واحد ماوحشنا منهم واحد لا يامولاى لا ده انت وحشتنا بالذات.
- بلاش بكش وشغل أغانى ياشهرزاد،أنا راجع من السفر تعبان وعايز قبل ماآخد دش وأنام تحكيلى أخبار الدنيا إيه بس الله يخليكى مش عايز أوجاع ولا آلام.
- هىء هىء هىء يامولاى الحياة من غير آلام دى مش موجودة غير فى الأحلام ويمكن فى الحواديت والأفلام.
- طب بطلى ضحك وادخلى فى الموضوع، بس قسمى الحواديت الحلوة حدوتة كل اسبوع.
- وليه حدوتة كل اسبوع مانا ممكن أخلى الحدوتة عشر حلقات،مانت عارف كان نفسى أطلع مؤلفة مسلسلات.وممكن الحلقة الواحدة أخليهالك تقعد تلات أربع ساعات.
- هاهاهاها الله يحظك ياشهرزاد،معنديش وقت لمسلسلات الشهد والدموع والآهات.أنا راجل عملى بتاع واحد زائد واحد يساوى اتنين والواحد وعشرين حاصل جمع تلات سبعات.
- هيهات يامولاى هيهات أنا بطلت الحواديت السريعة بتاعة الأرنب الغصبان والثعلب فات فات.
- شكلك فلستى ياشهر خلاص،عمالة تستهكلى وقت وكمان مستعجلة زى مايكون وراكى طيارة ولا باص؟
- فكرتنى يامولاى مش أنا حققتلك رغبتك؟مش دايما تقولى نفسك تعيش عيشة الفلاحين وتاكل مش من البلاص؟
- يوووووه بقى ياشهرزاد،عندك حواديت جديدة ولا أنادى مسرور يطير رقبتك وخلاص؟
- لالالا اعمل معروف يامولاى إدينى فرصة أقوم بس دقيقتين احط شوية بودرة وكحل وكريم أساس!
- أيوه صحيح مالك أنا من ساعة مارجعت ملاحظ إن لونك بقى اسود حالك ؟
- للدرجة دى باين عليا؟طب أعمل إيه ياما حاوت أشوفى فريق فى سكته سالك،فريق ينصفنى بدال اللى بالى بالك!
- معقولة ياشهرزاد لسه بتشجعى الزمالك مش كفاية ضغط الدم والسكر إللى جالك؟
- أعمل إيه يامولاى ماهو إدمان زى أى إدمان بيودى فى سكة المهالك.
- أنا عمرى ماشفت حد عدو نفسه كده،يابنتى روحى للمراية بصى لحالك.
- خلاص بقى يامولاى كفاية تقطيم ،متخلينيش اقولك هات مسرور أو أطفش من هنا وأحلف حواديت تانى مش قايلالك.
- طب خلاص متزعليش ياشوشو بس هو الزمالك مش كان جاب الخواجة ميتشو؟
- وياريتهم ماجابوا، بيحط تشكيلة عجيبة،باقولك إيه يامولاى ممكن نتكلم عن حاجة تانية وبلاش نجيب سيرة جنابو؟
- ماهو انتى غلطانة ياشهر،ياما قولتلك إعملى زى صحابى الكتير الزملكاوية قصدى إللى كانوا زملكاوية.
- اوعى تقولى بعد العمر ده كله عايزنى أقلب وابقى زيك أهلاوية؟
- بلاش أهلاوية ياستى الدنيا ماضاقتش،ممكن تبقى اسماعيلاوية ترسانوية،مصراوية، أسوانية.
- خلاص تاهت ولقيناها يامولاى أنا حاقلب بيرامدزاوية.
- واشمعنى بيراميدز يعنى يا شهرزاد؟
- أصله بلغنى أيها الملك السعيد ذو العقل الرشيد أن كتير من الزملكاوية بقوا بيراميدزاوية لأنها الفرقة الوحيدة إللى بتغلب الأهلوية!
- يامسرووووووور تعالى بسرعة طير رقبة البنت ديه.!
(وهنا أدرك شهرزاد الصباح فسكتت عن الكلام المباح وراح شهريار فى نوم عميق فتثاءبت شهرزاد وقالت ضاحكة بصوت رقيق:هىء هىء هىء نوم العوافى يامولاى).

 


 

 

 

 

الاخبار المرتبطة


نعم تغيرت نعم تغيرت السبت، 25 سبتمبر 2021 06:43 م
أخطر من كوفيد .. ولا تفسير علميا أخطر من كوفيد .. ولا تفسير علميا السبت، 25 سبتمبر 2021 06:32 م

 

                                                                                                                                            يــاريت يــاريت السبت، 25 سبتمبر 2021 06:30 م
هذا مدرب.. وآخر مدرب هذا مدرب.. وآخر مدرب السبت، 25 سبتمبر 2021 06:28 م
                                                                                                            خــــربشـــة خــــربشـــة السبت، 25 سبتمبر 2021 06:26 م
الطرف الثالث.. وكشف المستور الطرف الثالث.. وكشف المستور السبت، 25 سبتمبر 2021 06:23 م
                                                    بــالشـمـع الأحــمــر بــالشـمـع الأحــمــر السبت، 25 سبتمبر 2021 06:22 م

الأكثر قراءة


 

 

 

 

الرجوع الى أعلى الصفحة