عصام حسنى
سكوووت هنصور
كلب بلدى..
الأخبار
الأربعاء، 14 يوليه 2021 - 07:16 م
عمره ما نام ف حضن ست
معندوش حد يقوله seat
ولا حد مره قاله catch
كل اللى شافه ناوله طوبه
ربنا سترها ومجتش
لسه ح يقول إنه شاف م الدنيا ياما
عدّى واحد جنبه ماشى بالبيچامه
عمّال يبرطم كل جمله
نطقها على هيئة سؤال
طليقته أخدت منه كل حاجه
الشقه والعيال
بيسأل نفسه عن جمعيه واحده لحقوق الرجال
صعب عليّا أخدت جنب
لاحظ وجودى بصّ لى
وقال ل نفسه.. يا ريتنى كلب