أحمد شوقي أحمد شوقي

«ابن الوز عوام».. نجل مؤلف «حسن ونعيمة» رسام متجول في الشارع |حوار

بوابة أخبار اليوم الأربعاء، 04 أغسطس 2021 - 08:15 م

كتب: منى سعيد

على طاولة صغيرة مغطاة باللوحات المبعثرة، أخذ يرسم لوحات ألوانها تجذب العيون من شدة وضوحها فاقتربت منه ووجدته مستمرا في ما يرسم غير مبالى بمن راح أو جاء وشدتني اللوحة وكأنها صورة ملتقطة لا مرسومة فالوجوه التي يرسمها داخل اللوحة تكاد تنطق ويساندها في ذلك الامر تلك الأشجار بأوراقها المتمايلة اللوحة تأخذك من مكانك لمكان وعالم آخر وفجأة انقطع هذا الانسجام بصوت رجل موجها حديثه للرسام "ها خلصت اللوحة ولا لسه أظنه شارى لتلك اللوحة"، فرد صاحب اللوحات المبعثرة بصوت تكاد تكون فيه لكنة غريبة " انجلش" على عربى "خلاص قربت" إيه ده إنجليزي إزاي.


وأخذ يبحث في كيس بلاستيك عن الألوان التي يكمل بها لوحته ويخلطها بألوان أخرى والعرق يتصبب على جبينه ويجففه بيديه فأعطيته منديلا.

وتابعت حديثهما بتمعن لدرجة أن الرجل الشاري للوحة انتبه لمتابعتي لهما ولذلك بادر بتعريفي به ده الفنان أحمد شوقي رسام وأبوه كان شوقي عبد الحكيم مؤلف فيلم "حسن ونعيمة" وفيلم "شفيقة ومتولي" وعلى فكرة دا كان عايش في ألمانيا ولف أوروبا ورجع.

 

فجاة ساد صمت طويل لم أستطع الرد كأني مصدومة ابن مؤلف "حسن ونعيمة" بطولة سعاد حسني ومحرم فؤاد.. ياااه معقول مش ممكن ونظرت للرجل الرسام وهو مستغرق في الرسم محاولا إكمال اللوحة وجهه به بشاشة وطيبة وثيابه بسيطة جدا ومظهره ينبئ وكأنه شخص عادى جدا مش فنان وعلى الأرض وضع كيسه الممتلىء بالألوان الخاصة بالرسم ألوان زيت على ألوان شمع وواضح أنها ألوان يستخدمها الفنانين التشكليين وحاولت أن اظهر دهشتي بإعجاب وقلت له: والله معقول أنا باحب الفيلم ده قوي وواضح إنه فنان ابن فنان.


وانتظرت إلى أن انتهى من الرسم وشكره الرجل وحمل اللوحة ومشى وبدأت حديثى معه


 ممكن تعرفنا عن نفسك شوية ؟


أنا أحمد شوقي، رسام بأحب الفن التجريدي والرسم بكل أشكاله والرسم بالنسبة لي زي الهوا اللي باتنفسه ماقدرشي أتوقف عنه حتى لو ما حدش اشترى منى لوحة وبارسم لوحات من وحى خيالي، وممكن أرسم بورتريه وعملت لوحات كتير لما كنت مسافر ألمانيا ودول أوروبية وبعدين قررت وفكرت أرجع مصر أحسن بارسم وأبيع لوحاتي من خلال أصدقائي أو المعجبين في الشارع.

 

 هو صحيح والدك مؤلف حسن ونعيمة؟


نعم، والدي هو شوقي عبد الحكيم كاتب مسرحي وروائي وباحث في التراث الشعبي وكان مهتم بالفلاحين وحكاياتهم والمغتواتية عشان كده كان بيميل للأدب الشعبي، وعمل مؤلفات تمَ تحويلها إلى أعمال سينمائية شهيرة منها فيلم "حسن ونعيمة" وكانت سعاد حسنى لسه وجه جديد ومحرم فؤاد وفيلم "شفيقة ومتولي" وكتَبَ مسرحيتى«سعد اليتيم» و«العتمة» وأعمال كتير لسه موجودة ورغم غزارة إنتاجه والدي ماكانشى مهتم بالظهور وعاش معظم حياته في الظل وفضل العمل البحثي على الضجيج الإعلامي.


هل أثر عليك والدك بكتاباته ؟


أكيد والدي كان بيميل للأدب الشعبي والحكايات وممكن بسبب النشأة اللي كانت في محافظة الفيوم كمان عليها عامل والجو الريفي الجميل والطبيعة استمديت لوحاتي من بعض مؤلفات وكتابات والدي والسفر كمان زود خبرتي أعطانى حرية وإبداع وثقافة الشعوب بتتنقل من خلال الرسومات واللوحات اللي بتعبر عن كل بلد وأهلها.


 
لماذا العامل المشترك في كل لوحاتك الوجوه؟


شايف إن الحياة اللي بنعيشها عبارة عن وجوه بس مختلفة وكل مرحلة بنكبرأو نعديها فى حياتنا برضوا وجوه بتنقلنا من مكان لمكان فى وجوه مبتسمة عشان المرحلة اللي بنعيش فيها خلتها كده ووجوه محبطة من كتر تعب السنين .


 ما فكرتش تعمل معارض للوحاتك؟


المعارض مكلفة جدا والماديات مش متوفرة معايا، وبعدين أنا لما رجعت من السفر لقيت الدنيا اتغيرت مش زي ما كان والدي موجود برضوا كان بالنسبة لي السند وكان حوالينا ناس كتير وقت الشهرة بتاعته لكن الدنيا وحالها الحمد لله.


طب ليه ما فكرتش تعرض اللوحات من خلال موقع خاص بيك على الإنترنت؟


الحقيقة أنا مشغول بالرسم واللوحات أكتر وكمان أنا ماليش في شغل المواقع قوي وكذلك حد عرض عليه إنه يعرضلي لوحاتي على الفيس بوك والميديا وكنت فرحان لما لقيت ناس بتتصل بيه وتسألني على اللوحات بتاعتى بتتباع فين بعد ما اشتري منى الشباب كذا لوحة وهما اللى اصروا ينشروا تليفوني على الفيس.


هل الرسم مصدر لدخل يضمن حياة كريمة لك ؟


الرسم رغم إنه بياخد كل الوقت وبيستهلك أقلام وألوان وفرش لكن مش مناسب لدخل يعيش صاحبه إلا اذا كان عندك مكان خاص بيك بتعرض لوحاتك فيه وأنا كل لوحاتى زي ما قلت باعرضها في الشارع وساعات باقعد على قهوة ألاقي الناس إتلمت علية واشترت مني.

 

ممكن نعرف اللوحة تكلفتها وبتبيعها بكام ؟


أنا باستهلك ألوانا معينة مش عادية باشتريها وهي مكلفة ألوان زيت وباجيب أفرخ ورق واللوحة ساعات بابيعها بخمسين جنيها وساعات واحد يكون فاهم في الفن والرسم وهاوي بياخدها بميتين جنيه وفى شباب وبنات بيشتروا منى اللي بيدفعوه يعنى تلاتين جنيه وساعات عشرين المهم ما أكسفهمش.


اللوحة بتاخد منك وقت قد إيه ؟


أنا بارسم اللوحة في ربع ساعة ولو حد عايزني أرسم بورتريه ما ياخدشي نص ساعة مش بارسم وخلاص أنا في دماغى قصص وحكايات وباطلعها على الورق زي الكاتب بالضبط لما يمسك الورقة والقلم وتلاقي الورقة اتملت من غير ما يشعر.
انا كمان بارسم وكأنى جوا اللوحة مع القصص والاشكال اللى بارسمها والكل بيستغرب ازاى بارسم بالسرعة دى واللوحة بتطلع جميلة ومعبرة.


حاجة بتتمناها ومش موجودة؟


اتمنى ان لوحاتى تكون منتشرة والاقى معرض اعرضها فيها ولما دخلى يزيد اكيد اتمنى يبقى عندى معرض دائم ليه ويضم لوحات تانية لموهوبين نعمل فريق جميل مع بعض واتمنى يبقى فى معارض متنقلة من خلال المسئولين نعلم فيها الاطفال والكبار يعنى ايه رسم الواقع من الخيال .

الاخبار المرتبطة

الأكثر قراءة


 

الرجوع الى أعلى الصفحة