السبت، 09 يوليه 2022 - 06:21 م

لفتت نظري ظاهرة هروب بعض الخراف والعجول من الذبح وانطلاقها تجوب شوارع العاصمة وكباريها,قررت أن أنفرد بحوار مع واحد منها على أمل الوصول لتحليل هذه الظاهرة.كان حظي مع خروف كان قد توقف على جنب ليلتقط أنفاسه من مطاردة مثيرة.انتهزت الفرصة واقتربت منه وقبل أن يفر هاربا من جديد قدمت له نفسي حتى يطمئن, ويبدو أنه رق لطلبي عندما رجوته أن يتوقف قليلا معى لأنى كل ما اريده منه الإجابة على بعض الأسئلة التي قد تشفى غليلى وغليل القراء الاعزاء,والغريبة أنه اشترط للموافقة على الحوار ألا أنشر صورته حتى لا يتعرف عليه من يطاردونه لو شاهدوا صورته منشورة مع الحوار.

-      ممكن تعرفنى حكايتك أيه بالضبط ولماذا تهرب وممن؟
-      اشترانى واحد من الناس يسكن في عمارة شيك جدا,ربطنى فى وتد قوى على سطح البيت وكان يكرمني بالطعام والشراب كل يوم طبعا انتظارا ليوم العيد.
-      حد يلاقي يا عم الخروف أكل وشرب ببلاش اليومين دول؟
-      مانا كنت راضى ومبسوط , لكن فوجئت فى يوم بواحد آخر طلع للسطح وفك قيودي!
-      مش فاهم واحد تانى ازاى يعنى؟!
-      حرامى يا استاذ حرامى هى دى عايزة مفهومية؟
-      طب ما صرختش ليه وفضحته؟
-      تفتكر حد ممكن يكدب انسان ويصدق خروف؟
-      عندك حق طب كمل من فضلك
-       ابدا يا سيدى الحرامى كان نازل بيا فى الاسانسير وفى الدور السابع الاسانسير وقف وفوجئنا بحد من السكان بيسأل الحرامى انت ازاى يا جدع انت نازل بالخروف فى الاسانسير فالحرامى قاله معلش يا استاذ سامحنى أنا كنت جايبه لجارك اللى فوق واختلفنا فى السعر على 200 جنيه.قام الراجل عرض على الحرامى أنه يشترينى منه بالسعر اللى عايزه وطبعا قام رجعنى لنفس السطح وربطنى فى نفس المكان.وقضيت كام يوم دلع وهنا,اللى اشترانى فى الأول يطلع يحطلى اكل اخلصه بسرعة,وبعد شوية يطلع اللى اشترانى من الاسانسير يحطلى اكل تانى.لكن كما تعرف يا صديقى دوام الحال من المحال!
-      انت بتقول حكم كمان !
-      مليش نفس يعنى ولا ايه ما الحمير والكلاب بتقول حكم اليومين دول ولا يعنى انا اكمنى خروف؟!
-      لالالا ما قصدش ياصديقى معلش متزعلش منى وكمل حصل إيه؟
-      حصل في ليلة تصادف ان الاتنين طلعوا فى يوم واحد وطبعا صارت خناقة الأول يقول ده بتاعى والتانى يقول انا شاريه من الاسانسير والاول يرد عليه قول كلام معقول يا أستاذ حد يشتري خروف من الاسانسير؟ رحت انا مستغل الفرصة ونطيت من السطح جيت على عربية كانت واقفة قام صاحبها سحبني من قرونى وطلع بيا على السطح يشوفنى خروف مين علشان يصلح له العربية وبعد ما كان كل واحد بيقول انى خروفه الاتنين بدأوا يتنكرولى وكل واحد يقول انى بتاع التانى حتى ان الراجل الاولانى قال انى بتاع الراجل اللى اشترانى من الاسانسير اللى قال هو المرة دى للاولانى قول كلام معقول يا أستاذ فيه حد يشتري خروف من الاسانسير,,ياه عليكم يا صنف البنى آدمين فى ثوانى تغيروا كلامكم عشان مصلحتكم.
-      طب بس سيبك من الفلسفة دلوقتى وكملى حصل ايه؟!
-      طبعا الراجل لما طلع بيا على السطح عشان يشوف حل لعربيته اللى اتكسرت و احتدمت الخناقة بين التلاتة نسيوا والحمدلله يربطونى قمت جريت بسرعة ونطيت تانى بس نشنت على جنينة كبيرة ومنها للشارع زى مانت شايف كده!
-      بس انت غلطان أنا لو مكانك بصراحة كنت قلت الحقيقة وفضحتهم كلهم ولا كان همنى حاجة!
-      هو انت متعرفش يا استاذ اللى بيقول الحقيقة الايام دى بيحصله إيه؟ ثم إن فيه حاجة مهمة حضرتك مش واخد بالك منها؟
-      وتطلع إيه الحاجة دى ياسي خروف الفيلسوف؟
-      أنت مش واخد بالك يا استاذ,,انا آه خروف بس مش 

حمار!! 

( وهنا أصدر الخروف ضحكة عالية ثم أخذ يقهقه وهو ينظر لى للمرة الاخيرة وهو يضرب كفا بكف قائلا:العبيط عايزنى اقول الحقيقة قال) !!

ثم أطلق ساقيه للريح !!

[email protected]