«ذكريات» قصيدة للشاعر خالد الطيب
«ذكريات» قصيدة للشاعر خالد الطيب
الأربعاء، 17 مايو 2023 - 01:58 م
صفوت ناصف
يانجوم مسافره ف السما
وسايبه ع الأرض السلام
بعت لك ويا الهوى
من كام سنه جوابات
بعد حروف البسمله
و حبة حاجات متشوقه
ماعدش باقى م الزمن
غير ذكريات
راجعه تخبط ع البيبان
نفس المكان
لساه بيشكى م السوكات
ولا حبات المطر
ساعة الخطر
لما تطأطأ ع الشجر
وتشد اوتار الشجن
ف أنحت حدودك ف الخيال
وألمس كفوفك واحضنك
يمكن يجوز
قلبى اللى سارح ف الوجود
يلمح عيونك ف الفضا
حتى القمر
لملم خيوطه م السهر
وغمض عيون المستحيل
لجلن يعيش
سواح على شط الحنين
وصوت الآدان
مالى المكان
بينده ع الفجر اللى غاب
يرجع له تانى م السفر
مستنى يشوفك ف المنام
لسه باقى كام جواب
واقفين على اعتاب النهار
بيشكوا م الشعر اللى شاب
ويبكوا ع العمر اللى فات
عايشين بيتمنوا لؤاك
بعد الغياب
يا نجوم مسافره ف السما
مشتاق يشقشق ضيها
مشتاق يشقشق ضيها