الإثنين، 23 ديسمبر 2024 - 01:52 م

تألقت المذيعة سالي عبد السلام في حفل جوائز آمال العمدة ومفيد فوزي لعام 2024، وظهرت بإطلالة خطفت الأنظار بفستان باللون الرمادي طويل وضيق بأكمام طويلة.

وصففت شعرها بأن يكون منسدلاٌ ومجعدا على كتفها مع مكياج بألوان قوية تبرز ملامحها وحازت إطلالاتها علي إعجاب الجمهور .

كما خرجت  سالي عبد السلام وعبرت عن سعادتها بحصولها على جائزة تحمل اسم آمال العمدة ومفيد فوزي وقالت: "من أهم وأعظم التكريمات في حياتي، جايزة الإعلامى والمحاور مفيد فوزى و الإعلامية آمال العمدة.

وتابعت قائلة :"شكرا حنان مفيد فوزى حبيبتى كدة 15 سنة إذاعة،جايزة كبيرة ومهمة وغالية على قلبي أوي شكرا لأهلى وأولهم مامى أول من عملنى وعلمنى، شكرا لكل أساتذتي شكرا ليكم انتوا لكل حد حبنى من أول ما بدأت".

وبكلمات مؤثرة أعلنت الإعلامية سالي عبد السلام فقدانها لجنينها التوأم قبل ولادتهما معبرة عن مدى حزنها بفقدانهم بعد عامين من الصبر والانتظار.

ونشرت سالي عبر صفحتها الشخصية على فيسبوك تفاصيل إجهاضها قائلة :«قدر الله وماشاء فعل من كام يوم ..وده بعد سنتين انتظار التوأم اللى كان نفسى فيهم أوى يا رب.. سنتين صبر وأنت مفيش قدامك غير الصبر زي اى رزق والحمد لله إن اختباري كان في الصبر وبس مش اكتر وكنت طالباها تيجى من عند ربنا ومن غير تدخل دكاترة».

وتابعت سالي عبد السلام موضحة :«الحمدلله على نعمة الاخذ بعد العطاء.. فقدت أغلى ما ليا واللى كان هيكون ليا.. الحمد لله قدري بس ليا بيتين فى الجنة » مشيرة إلى أنها تكشف تفاصيل إجهاضها ردا على من أدى أنها ترفض الإنجاب بسبب طبيعة عملها قائلة :«أنا بكتب الكلام ده عشان يمكن حد يتعلم..كل حد قالى وقال عليا  مش عايزة تخلف عشان خايفة على جسمها و شغلها وكانت اوحش حاجة سمعتها فى حياتي».

ضغوط

وتابعت مؤكدة على أن رسالتها لكل من أعطى لنفسه الحق في التدخل في حياة الأخرين ومعبرة عما تعرضت له من ضغوط قائلة:«عشان كل حد بيضغط على اللى قدامه وفاكر إن حقه وده لا يحق له عشان المفروض إنه قريب أو معتبر نفسه كدة ومش من اهله اصلاً ولا يحق له».

وأضافت:«يحسسهم إن وراهم تارجت يا إما هيكون منبوذ منهم وهنسود عيشتك بسؤالنا كل شهر ونضغط عليك مع إنهم مش هيشيلوا اصلا و محدش هيشيل غيرك» مستكملة :«أوعي تقولي انك حامل وخافى من العين واى كلام فى الموضوع ده بالذات أنا مقولتش وبرضه محصلش».

رسالة

ووجهت سالي عبد السلام رسالة إلى جميع السيدات قائلة :«عشان كل ست اوعي تبقى ب ١٠٠ ست و تشيلى مسؤولية كل حاجة لوحدك.. الست الجدعة بجد مبتاخدش حاجة.. الست الجدعة محدش بيساعدها وكله بيرمى عليها وكمان لما منعرفش نبقى زيها نعطلها أو نقلل منها وبمعنى اصح نبقى سبب فى سقوط كل حاجة فيها مش اطفالها بس».

واختتمت قائلة :«يا ريتنى قولت مبعرفش أو مش هقدر عشان موصلش لكدة.. كلنا تعبنا و بنتعب ومحدش بيحس ومحدش طلب منك تحس بس الرحمة» مضيفة :«كل اللى كتبت عنهم بينى وبينكم الله..إنا لله وإنا إليه راجعون.. ادعولى كتير.. راضية والحمد لله بس بنهار وأنا بصلي ومش بطلب غير الثبات من ربنا».

اقرأ أيضا|

في ختام النسخة الرابعة من «الأبد هو الآن».. جمع 14 فنانًا من مختلف دول العالم