الأحد، 29 ديسمبر 2024 - 11:03 م

في حوار قبل عامين، كشفت الراحلة "ونيسة أحمد عاطف،"، زوجة الفنان الراحل أحمد عدوية، تفاصيل جديدة عن الحادثة الشهيرة التي تعرض لها زوجها، والتي كادت تنهى حياته في الـ40 من عمره.

وقالت خلال لقائهما ببرنامج "كلمة أخيرة" الذي كان يقدمه الإعلامية لميس الحديدي بقناة "أون": "أصعب لحظة في حياتي لما حصلت لأحمد عدوية الحادثة وأنا باستقبله في المستشفى وما كنتش عايزة أسيبه وفاكرة إن كان فيه ست كبيرة كانت بترقيه بالقرآن، وأنا قلت لا يمكن يكون حي واتهيألي إنه ميت واعتقدت إنهم هياخدوه مني ويشرحوه ويسلموه لنا جثة متشرحة".

وأضافت زوجة الراحل أحمد عدوية: "سافرنا باريس لعلاج أحمد عدوية وهناك اتكلم فجأة وربنا لما يحب يريد ودي معجزة من معجزات ربنا أن عدوية لم يمت وظل حيًّا".

أصعب لحظات أحمد عدوية

ولفتت: "فترة علاج أحمد عدوية استمرت من 3 إلى 4 سنوات وفضلوا يقولوا لي إنه لازم ينزل يغني علشان يفتكر الناس لإن كان حصل له جلطات في المخ وحصل مشكلة في الذاكرة".

وأشارت: "خلال مرض أحمد عدوية مفيش فنان صغير أو كبير أو فنانة صغيرة أو كبيرة ما سألوش عنه أو ما قربوش منه وزاروه لحد لما خف وعادل إمام كان على طول يبعت لنا الفنان مصطفى متولي باستمرار لأنه كان بيحب أحمد عدوية أوي".

وأشارت: "كانت سعادة أحمد عدوية رهيبة لما رجع البيت وشاف ولاده ولما نزل من العربية كنت موصية أدبح له حاجة تحت رجليه وفعلًا دبحنا ووزعنا لله والقرآن على طول شغال في البيت وبقى فيه جو من الروحانيات وبعد كده بـ3 سنين عملنا حفلة في هيلتون النيل وقلت كل اللي يحب عدوية رجع تاني ولازم تحضروا الحفلة ومفيش حد ما حضرش الحفلة سواء من مصر أو خارج مصر الكل حضرها بحب لأحمد عدوية".

وفاة أحمد عدوية:

وتوفى منذ قليل رائد الأغنية الشعبية أحمد عدوية عن عمر يناهز الـ79 بعد صراع مع المرض الذي اشتد عليه بسبب حزنه على رحيل زوجته، حيث منعه المرض آنذاك من حضور جنازتها وعزائها.