الثلاثاء، 05 مايو 2026 - 02:14 م

كشفت الفنانة نادية مصطفى كواليس آخر لقاء جمعها بالفنان الراحل هاني شاكر أثناء تواجده في المستشفى بالقاهرة.

وقالت نادية مصطفى في مداخلة مع برنامج "الستات" مع سهير جودة: "وهو في المستشفى هنا شفته ورحت له العناية المركزة بس كان لسه موصلش للمرحلة الصعبة دي كنا قاعدين بنتكلم وكان معانا أستاذ مصطفى كامل وكان بيضحك معانا وبيهزر بس فجأة حس بحاجة وجعته، بعد كده بعد العملية مشفتوش، بس نهلة بعد ما خرج من العملية كانت بتضحك ومبسوطة أنه فاق وكان كويس".

وأكملت نادية مصطفى: "بعد العملية تاني يوم كنا في رمضان قبل الفطار كنت بكلمها قالتلي أنه كويس قلتلها سلميلي عليه هو عارفني؟ قالتلي عارفك وحرك شفايفه وقال "الله يسلمك حبيبتي" أنا كنت من جوايا فرحانة بيه".

وأضافت نادية مصطفى: "هاني شاكر مش هيتنسي هو قال نسيانك صعب أكيد وهو نسيانه صعب وفراقه صعب جدا ربنا يرحمه، كنت لآخر لحظة بقول لنهلة زوجة هاني شاكر إن شاء الله هيبقى كويس يمكن الأجهزة لما تتشال يبقى كويس لآخر لحظة عندي ثقة أنه هيبقى كويس مش قادرة أصدق ولا استوعب أنه يحصل عكس اللي كنت متوقعاه ربنا يارب يصبر الست الجميلة لأنها من وقت وفاة بنتها هو اللي كان بيقويها".

وأكملت: "هو نموذج للفن الحقيقي ووجه مشرفة لمصر وضحكة مصر الحلوة أنتوا كلكوا سمعتوا ضحكته شوفوا قد إيه كانت جميلة هتوحشنا ضحكته، أنا وهاني ونهلة إخوات بجد في الحلوة والمرة، لما كنت بحس اني مخنوقة ومتضايقة كان يقولي متقلقيش أخوكي معاكي وجنبك".

وعن شيء لا يعرفه الجمهور عنه قالت نادية مصطفى: "هاني شاكر أحلى صوت يؤم في الصلاة كتير كنا نتزاور في البيت في رمضان يؤمنا كلنا في الصلاة أحلى صوت".

رحل الفنان هاني شاكر عن عالمنا عن عمر ناهز 73 عاما بعد صراع مع المرض.