الخميس، 01 نوفمبر 2018 - 09:39 ص

قالت عبير أحمد مؤسس اتحاد أمهات مصر للنهوض بالتعليم، إن الاتحاد رصد مجموعة من الشكاوى والمعوقات واجهت أولياء أمور وطلاب الصف الأول الثانوي المطبق عليهم نظام الثانوية العامة الجديد.

وأضافت أحمد، في تصريحات صحفية، أن أبرز المعوقات تمثلت في عدم شعورهم بأي تطور ملحوظ وملموس حتى الآن، ولم يتم تدريب الطلاب علي نظام الامتحانات الجديدة، مشيرين إلى أن الشرح في المدارس بالنظام القديم كما هو، إضافة إلى جعل المواد ممتدة طوال العام وهو ما يمثل عبء عليهم، وزيادة الدروس الخصوصية لعدم استيعاب وفهم الطالب للشرح داخل الفصل.

وناشدت أحمد، وزارة التربية والتعليم بسرعة العمل على معالجة جميع المعوقات التي تواجه أولياء الأمور لرفع المعاناة عنهم ومن أجل انضباط العملية التعليمية ونجاح نظام التعليم الجديد.

وتفاعل أولياء الأمور على صفحة اتحاد أمهات مصر للنهوض بالتعليم في الفيس بوك، حول أبرز المعوقات التي واجهتهم منذ بداية العام الدراسي وحتى الآن خاصة لطلاب الصف الأول الثانوي المطبق عليهم نظام الثانوية الجديدة، حيث قالت ولي أمر: "المشكلة إن المدرسين في دنيا تانية ومش فاهمين حاجة اصلآ علشان احنا نعرف ومريحين نفسهم خالص من موضوع الشرح، بيقولوا عناوين واقلب  الدرس مش بيشرحوا حتي بربع كفاءه اي مدرس  بيدي في أي سنتر، والمشكلة مش كثافة ابدآ بدليل اننا بنلاقي اي مستر في سنتر بيشرح ويقدر يوصل المعلومة برغم العدد الهائل اللي موجود في القاعة علي اجماع الطلبة، فيا حضرت الوزير اذا سمحت لما اجي اطور التعليم من باب اولي اهيئ وادرب المدرس وأعلي مستواه ويكون في متابعة ومراقبة عليه ويأخد بشكوي الطلاب عندما يوجد معلم لا يؤدي دوره علي أكمل وجه وعدم وجود ضمير او بيشرح على اد فلوس الحكومة زي ما في منهم بيقول والله لو قبض بالدولار مفيش فايدة ده طبع لأنه السبب في كل فشل المنظومة دي، طبعآ أنا مش بعمم، إلا من رحم ربي، اكيد في مدرسين محترمين وعندهم ضمير لكن للأسف أقلية، أصبحت المدرسة تضييع لوقت ومجهود الطالب وبقت عبئ عليه مش العكس للأسف، وبعدين طريقة الامتحان اللي محدش عارف عنها حاجة دي ايه ولا التابلت اللي الوزير صرح إن الطالب هيستلمه من أول يوم ده فين!، كمان موضوع العلمي علوم ورياضة اللي حيتلغي ده ليه يعني ايه هدفه؟".

وأضافت ولي أمر أخرى: "مفيش شغل في المدارس اطلاقا، لا يوجد أي تطوير، أين تدريب الطلاب على الامتحانات الاونلاين؟، أين تعويد الطلاب على امتحانات الopen book، ونظام التعليم كما هو، ولا يوجد أي شغل في المدارس مع ضرورة الالتزام بالحضور، ودروس ف كل المواد، ولا يوجد وقت للطلبه للمذاكره"، واستكملت أخري: "احنا لغاية دلوقتي الشرح في المدارس بالنظام القديم لا جديد سوي إنهم أخبروا الطلبة بإن في امتحانين في الترم والطلبة مرهقة ومش ملاحقين الدروس".

وذكرت ولي أمر: "دي كل السنه معوقات، مواد ممتدة، دروس في كل المواد، مفيش وقت للمذاكرة، مدرسين مبيشرحوش لأنهم عارفين إن كل الطلبه بتاخد دروس، بالإضافة الي النظام الجديد اللي محدش فاهم فيه حاجه ولا حتي المدرسين" ، وتابعت أخري: "هو فين النظام الجديد، احنا ماشيين على قديمه والمناهج هى هى بغباءها، ومعالى الوزير هيعمل أسئله تقيس الفهم طب ازاى وانت مغيرتش المناهج ومطورتش المدرس، كله ماشى على الحفظ وأسلوب الدراسة العقيم اللى بيكره الطالب فى المدرسه والتعليم وعبيء الدروس زى ما هو، غير إن المدارس الحكوميه حالها يرثى لها".

وقالت ولي أمر: "مواد كتير مفيش وقت للمذاكرة، دروس في العادي علي النظام القديم، مصاريف مش في الحسبان، كتب خارجيه بمبالغ مرتفعه، 
حضور المدرسه بلا فائده، المدرسين بدون شرح، وقراءة من الكتب بس، لو رسب الطالب في ماده بعيد السنة يعني بيحطم الطلاب، أولياء أمور بتكلم نفسها"، وأضافت أخرى: "والله كلمه نظام جديد دي حرام، مفيش أي حاجه جديدة، والمدرسين مفيش شرح، وكله مستني مفاجأه الامتحان اللي محدش يعرف عنه حاجة".