الأخبار

الإثنين، 04 يناير 2021 - 05:57 م

منذ وجه الكاتب الصحفى  خالد ميرى رئيس التحرير بنشر إبداعات الشباب من قصة وشعر، والنصوص تنهمر على بريدنا "الإلكترونى" والتقليدى، والحقيقة أننا فوجئنا بإبداعات غاية فى التميز سواء فى القصة القصيرة أو قصيدة الفصحى، أو فى شعر العامية الذى يشهد ازدهارا ملحوظا، وقد تلقينا قصيدة من شاعرة جنوبية أذهلتنا، وبهرنا تميزها، وعمقها، حيث أفصحت صاحبتها الشاعرة "حبيبة الزين" عن موهبة فائقة وقدرات هائلة، وأنشدت قصيدتها الرائعة التى ننشرها اليوم بنضج ملحوظ، إننا نراهن على هذا الصوت الذى يذكرنا بنجوم العامية المصرية الذين ملأوا الدنيا إبداعا جميلا، ونحن واثقون أن صوت حبيبة سيدوى فى مستقبل الأيام، لذا نهدي إلى الحياة الأدبية فى مطلع العام الجديد قصيدتها المذهلة "سيرة الجميز"

 

سيرة‭ ‬الجميز

فى الليل..

شعرات النخل بتتدلى مع نسم الريح 

بينام القول..

وتطفى عيون الناس جوه المصابيح

إلا ونسة بيت الجميز

كات شجرة أصيلة ولها مُريدين

يتلموا عليها يحطوا ع الخشب الجاز

والطير.. مركون خوف م الدُخان

غارس فى طبيعة الكون.. بينام

واحنا.. اتناشر روح صاحيين

حاشيين النوم من عنينا.. زارعينها كلام

وإيدين " سلمى " زى البراد بتبص لتحت وتقول

-( من يوم الفرقة ما دقت على قلبى ما ارتحت وادينى عايشة بصب الشاى ويصبنى هو فى الأيام )

وتقوم وتعاتب الورد ) برويك يا جبان ولحد الآن لسا ما فتحت( !

بكيت يومها سواد أغمق من قلب البير

زعقت غربان، ناحت بوابير

كات سمرا وعذبة وقاتلها حنين

روحها فى أبوها وفى ريحة الطين

ضحكتها عارفاها الناس وماعشراها

حضنها واسع فيه مطروح التين

لولا عنيها حابسين الدمع

مستنى بس الفرصة عشان يسري

زى النيل المحبوس فى السد

لو لحظة فتحوا ليه الباب.. يجرى !

بيت مليان حنية ومقفولة أبوابة

تفرش قسوتها بس على اعتابه

واخدها وراثة من جد لجد

لكن لو جيت للجد

يتمد حنانها لحد بيوت أحباب غابوا

وانا وحدى فى الليل

بكنس قدام عتبات بيتنا

وبحط حصير..

مرشوش بمحبتى للدنيا

وتعب المشاوير..

بستنى الناس..

زى الزرع ما يستنى الشمس

بستنى حكاوى الجيرة.. بستنى وبس

آه يا جميز عاجز زيى وبتحس

لا منهم شبعانين بيك،

ولا منك راضى عن ضِلك

لما يتخبوا فيك..

ويعدى الليل ينسج فى خيوط الصبح

ويمر الصبح السابح فى ضلام الليل

ومازلت بخاف وأحزن وأفرح

وأسند راسى ع الجميز وأسرح

نفس الجميز..

اللى مال جدى عليه وعجز..

روحى تعجز..

واقوله كفاية ضِلك بيحابى الناس

وأغفل..

وأحلم بالجميز بيطبطب فيا ويقول :

قلبك تحويشة لحوجة الناس 

وأفوق مِ الغفلة حاسا بالخوف اتسحب

وهواجس شكى دخلت جوه السرداب

وأجس بإيدى الشجرة واتمنى اخدها ف حضني

زى الأرض ما تاخد الحّب

وأحب..

أفضل طول العمر بحب

والجميز.. تفضل حواليه الناس بتدب