لميس سلامة
بالونة حبنا..!
الأربعاء، 10 فبراير 2021 - 11:50 م
كتبت : لميس سلامة
هو عيد الحب جيه؟.. سؤال بسأله لنفسى كل سنة أول ما يهل علينا عيد الحب وأبدأ أتكعبل فى صور وفيديوهات لبلالين وهدايا وفوتوسيشن وديكورات وإضاءات ودهب وياقوت ومرجان وتورت يجيى ١٥ دور وقصص حب من اللى تبهر دى وتخليك فاتح عينيك مش مصدق ان دول معانا على نفس الكوكب..
والحقيقة هو ده شكل الفلانتاين الجديد اللى بنشوفه على السوشيال ميديا اللى يعقد اللى ما يتعقدش ويخليك قاعد يا ولداه متحسر على شبابك اللى ضاع من غير ما تقضى يوم زى ده مع اللى بتحبه.
بس بذمتك الشو والتصوير ده ومزاد مين يبهر مين أكتر أحلى ولا قاعدة بسيطة وحقيقية على النيل من بتاعة زمان مع كلمتين حلوين طالعين من القلب؟
ماتنبهروش بالسوشيال ميديا وركزوا انكم تبهروا الطرف التانى بأفعالكم اللى تثبت حبكم لأن ده اللى بيوصل للقلب..
طبعا فيه واحدة مخطوبة بتقرأ دلوقتى نفسها ومنى عينها تعيش يوم رومانسى تحكى وتتحاكى عنه.. هرد عليكى وأقولك بصى يا ست الكل اما انك تقعدى جانب أختك اللى هى أنا فى مدرجات المتابعين ننبهر ونتفرج ويومين وننسى.
أو انك ترضى بقليلك وتشوفى هو ناوى يفتكرك بإيه وتفرحى بيه.
ترد واحدة تانية متجوزة تقولى طب وأنا هعمل إيه؟
انتى بقى لو أقنعتيه بقاعدة النيل إياها دى تحمدى ربنا انه نزل معاكى وتستحمليه لو فضل لازق موبايله فى وشه.
ولو ما قتنعش بالخروجة عليكى وعلى كيكة العشر دقايق وظبطيها بشوية فراولة واستقبليه بيها.
هيقولك إيه ده بمناسبة إيه؟ اوعى يجيلك إحباط.
أومال أنا بقولك من قبلها ليه؟
قوليله ده عيد الهلع وخديه وخشوا ناموا
وخاليكوا واقعيين اللى بيحصل على السوشيال ميديا ده عدى حدود التمثيل والشو.
بس بالنسبة للرجالة اوعوا كلامى ده ينسيكم الهدية لأن دى قصة تانية لا ليها علاقة بالسوشيال ميديا ولا قاعدة النيل ولا كيكة الفراولة..
عقلك فى راسك وكل عيش وعليك وعلى أقرب محل فى سكتك افتكرها بأى هدية بدل ما ترجع تقول عليها نكدية.
اللهم بلغت