الخميس، 30 سبتمبر 2021 - 06:14 م

قبل أى شيء وبعد كل شيء .. اللى بيحصل فى اتحاد الكرة فاق الوصف والخيال يا ناس .. تانى شوقى غريب  تانى .. طب ليه .. ما يكونشى واخد حق امتياز أو الوكيل الحصرى لتدريب المنتخبات الوطنية فقط على مدار ٢٤ سنة .. يا عم أحمد مجاهد وربنا المعبود لو هو مدرب الحامول وفشل عمرك ما كنت هاترجعه تاني.              

                  
وكمان طلعت تقول تدريب المنتخبات الوطنية مش وظيفة فى الكهرباء .. عشان نختار أى مدرب والسلام .. ده على أساس أن الكابتن شوقى غريب كهربائى وبيفهم فى الكهرباء !

صحيح شوقى غريب نال الميدالية البرونزية فى مونديال الشباب فى الارجنتين ٢٠٠١ لكنه فى ذات البطولة خسر 1/7 من الارجنتين .. وكمان بعدها كمل مع المنتخب الاوليمبى فى ذات المرحلة السنية وخسر أمام نيجيريا وفشل فى التأهل لدورة أثينا الاوليمبية عام ٢٠٠٤.

صحيح كان المدرب العام للمنتخب مع الكابتن حسن شحاته بصلاحيات مدير كرة وكل الشغل الفنى كان من المعلم وحمادة صدقى المدرب لكنه رجع تانى فى عام ٢٠١٣ ليتولى مهمة المدير الفنى للمنتخب الأول يا رجالة بعد أن فشل فى التأهل لبطولة افريقيا مرتين متتاليتين ..

ونجح أبو الشوق فى الوصول  لينا ل» هاتريك فشل «.. بعد أن تراجع  المنتخب للمركز الثالث فى مجموعته عقب الخسارة أمام توتس 1/2 وتمت الاطاحة به.

 المفروض لحد كدة  كفاية .. لا.. ازاى .. ده أبو الشوق يا ناس .. مدرب ناصح وزكى ويعرف من أين يأتى القرار رغم  كل مسيرته فى التدريب كانت فى كل مرة غير موفقة بالمرة مع الاندية وأسالوا الاسماعيلى والاتحاد السكندرى والانتاج الحربي. 

يا عم  أيها المجاهد علينا فقط .. هناك العديد من المدربين أفضل منه فى تلك المرحلة.. عندك الكابتن الكبير والقيمة الفنية والاخلاقية ربيع ياسين والذى تم تصفيته عشان خاطر عيون أبو الشوق ..

وكمان فيه حمادة صدقى وهو برضه كان زمل لأبو الشوق وحقق نجاحات رائعة مع  العديد مع الاندية وهناك ايهاب جلال والعميد حسام حسن.

كلمة فى سرك يا عم أحمد.. أبو الشوق لو عايز مترجم أنا جاهززززز ..عشانك يا مصر.