الخميس، 23 ديسمبر 2021 - 09:25 م

أحمد عباس

مالك يا سانتا ايه جرى ايه، فين الهدايا واللعب، فى الزكايب والعلب، فين لعبتى.

فاكر طلباتى واللا كبرت وبقيت نساى، هى هى ماتغيرتش، لا انت حققتها ولا أنا نسيت، ولسة ذاكرتى حديد، فين هدايا الناس وفرحة عيالهم، ليه رابعة ابتدائى صعبة مع ان خامسة أكبر وسادسة هى الشهادة.. عندك اجابة!

وليه يا سانتا الناس فى غربة فى بيوتهم وليه اللمة كدابة، صحيح الوقت بقى اسرع لكن لسه له رتابة. طب فين فرحتى بسلمى، وفين ضحكتى لمريم وفين غمضة عنيا لما ينطقوا اسمك، وفين نشوتى بسيرتك وليه فضفضتى ليلة العيد بقى نصها كآبة!

صوت الجرس جاى من بعيد، اسمع معايا رنته تفرح مع انه خبطة حديد فى حديد، فرحة عيال مزأططين لابسين جديد فى جديد، والبنات حتى البنات حنيت شعورها بلون أحمر فاقع عنيد، مستنيين الحلم عام ورا عام وكل ليلة بيعيشوها عيد.

اللبس أحمر والحلم أخضر والقلب حانن والعقل فاهم لكن مكبر، يا سانتا فّوق وقول أكتر..
فين فرحتى وضحكتى، فين بهجتى ومهجتى، يا سانتا قول فين لعبتي!

أقرا ايضا | احتفال طعمجى برأس السنة